కొత్త రోల్స్ లో ప్రేక్షకులు నన్ను యాక్సెప్ట్ చేస్తున్నారు: రకుల్

సౌత్ ఇండస్ట్రీ స్టార్ హీరోయిన్స్ లో ఒకరైన రకుల్‌ ప్రీత్ సింగ్.. కొన్నేళ్ల పాటు తెలుగు తమిళ భాషల్లో వరుస సినిమాలలో నటిస్తూ బిజీగా గడిపింది. అయితే తెలుగులో నటించిన 'స్పైడర్' - 'మన్మథుడు 2' సినిమాలు ప్లాప్ అయిన తర్వాత టాలీవుడ్ కు కొన్నాళ్ళు దూరమైంది. ఈ నేపథ్యంలో ఇప్పుడు చాలా గ్యాప్ తర్వాత ''చెక్'' సినిమాతో తెలుగు ప్రేక్షకులను పలకరించింది రకుల్. యంగ్ హీరో నితిన్ హీరోగా క్రియేటివ్ డైరెక్టర్ చంద్రశేఖర్ యేలేటి దర్శకత్వంలో తెరకెక్కిన ‘చెక్’ ప్రపంచవ్యాప్తంగా ఫిబ్రవరి 26న(శుక్రవారం) విడుదలైంది. ఇందులో రకుల్ ప్రీత్ సింగ్ తో పాటు ప్రియా ప్రకాష్ వారియర్ హీరోయిన్ గా నటించింది. ఈ చిత్రాన్ని భవ్య క్రియేషన్స్‌ పతాకంపై వి. ఆనంద్ ప్రసాద్ నిర్మించారు. డిఫెరెంట్ కాన్సెప్ట్‌ తో వచ్చిన ఈ చిత్రంలో రకుల్ ప్రీత్ సింగ్ నటనకు మంచి మార్కులు పడుతున్నాయి. లాయర్ పాత్రలో ఆమె చూపించిన అభినయాన్ని విమర్శలు సైతం మెచ్చుకుంటున్నారు.

ఈ నేపథ్యంలో రకుల్ ప్రీత్ సింగ్ తన ఆనందాన్ని వ్యక్తం చేసింది. "నా అభిమానులు మరియు ప్రేక్షకుల నుండి నాకు పాజిటివ్ రెస్పాన్స్ లభిస్తోంది. కొత్త పాత్రల్లో మరియు పెర్ఫార్మన్స్ సెంట్రిక్ క్యారెక్టర్స్ లో నన్ను అంగీకరించినందుకు వారికి ధన్యవాదాలు" అని రకుల్ చెప్పారు. ఇకపోతే రకుల్ ప్రీత్ సింగ్ ఇటీవలే క్రిష్ - పంజా వైష్ణవ్ తేజ్ కాంబోలో తెరకెక్కుతున్న సినిమా షూటింగ్ పూర్తి చేసింది. ఇక బాలీవుడ్ లో జాన్ అబ్రహాంతో కలిసి 'ఎటాక్' సినిమా చేస్తోంది. అలానే అర్జున్ కపూర్ తో కలిసి ఓ సినిమా.. బిగ్ బి అమితాబ్ బచ్చన్ - అజయ్ దేవగన్ ప్రధాన పాత్రల్లో నటిస్తున్న 'మే డే' సినిమాలలో రకుల్ నటిస్తోంది. తమిళ్ లో శివ కార్తికేయన్ సరసన 'అయలాన్' చిత్రంలోనూ రకుల్ నటించనుంది. ఇలా టాలీవుడ్ టూ బాలీవుడ్ వయా కోలీవుడ్ అన్నట్లు అమ్మడి కెరీర్ ముందుకు సాగుతోంది.