ఒక టాలీవుడ్.. ఒక బీఏ రాజు

సూపర్ స్టార్ కృష్ణకూ ఆయనే.. మహేష్ బాబుకూ ఆయనే. ఆ మాటకొస్తే రేపొద్దున గౌతమ్ కు కూడా ఆయనే ఉంటారు. కోలీవుడ్ నుంచి రజినీ వచ్చినా.. బాలీవుడ్ నుంచి అమీర్ ఖాన్ వచ్చినా.. సినిమాను ప్రమోట్ చేయాలంటే ఆయనే ఫస్ట్ ఆప్షన్. తరాలు మారినా అందరికీ తలలో నాలుక ఆయనే. దేశంలో బాలీవుడ్ తర్వాత అత్యధికంగా సినిమాలు తీసే తెలుగు సినీ పరిశ్రమలో పీఆర్వో అనే పదానికి పర్యాయ పదం బీఏ రాజు.

తరాలు మారుతున్నా.. సినిమాల తీరే మారిపోతున్నా.. ఎప్పటికప్పుడు పరిశ్రమలోని అన్ని క్రాఫ్ట్స్ లోనూ ఎన్నెన్నో మార్పులు చోటు చేసుకుంటున్నా.. ఇప్పటికీ ఎప్పటికీ బీఏ రాజు ప్రత్యేకత బీఏ రాజుదే. వెయ్యికి పైగా సినిమాలకు పీఆర్వోగా చేసిన వ్యక్తి ఇండియాలో వేరే పరిశ్రమల్లో ఎవరైనా ఉన్నారా అంటే సందేహమే. కానీ మనకు బీఏ రాజు ఉన్నారు. వందల సినిమాలు తెరకెక్కే టాలీవుడ్లో ఎవరికి ఏ సమాచారం కావాలన్నా.. సినిమాను ఏ రకంగా ప్రమోట్ చేయాలన్నా.. ఎవరికి ఏ పని చేసి పెట్టాలన్నా బీఏ రాజే కనిపిస్తారు. ఇటు మీడియా వాళ్లకు.. అటు పరిశ్రమకు అనుసంధాన కర్తగా వ్యవహరిస్తూ దశాబ్దాలుగా తన ఘన ప్రస్థానాన్ని కొనసాగిస్తున్నారు బీఏ రాజు. ఇవాళ ఈ లెజెండరీ పీఆర్వో పుట్టిన రోజు.

రెగ్యులర్‌గా సినిమాలకు పీఆర్వో బాధ్యతలు నిర్వర్తిస్తూనే.. ఓవైపు సూపర్ హిట్ మ్యాగజైన్‌ను నడిపిస్తారు. మరోవైపు ఇండస్ట్రీ హిట్ వెబ్ సైట్ బాధ్యతలూ చూస్తున్నారు. ఇవన్నీ కాక అప్పుడప్పుడూ ఆయన సినిమాల నిర్మాణమూ చేపడతారు. ప్రస్తుతం ఆయన బేనర్లో ‘వైశాఖం’ అనే వైవిధ్యమైన సినిమా తెరకెక్కుతోంది. కొత్త నటీనటులతో రాజు సతీమణి బి.జయ ఈ చిత్రాన్ని తెరకెక్కిస్తున్నారు. ఉన్నత ప్రమాణాలతో తెరకెక్కుతున్న ఈ చిన్న సినిమా కొత్త ఏడాదిలోనే ప్రేక్షకుల ముందుకు రాబోతోంది. ఆ సినిమా విజయవంతం కావాలని.. మరోవైపు పీఆర్వోగా బీఏ రాజు ఘన ప్రస్థానం మరింత ఉన్నత శిఖరాలకు చేరాలని ఆకాంక్షిస్తూ ఆయనకు జన్మదిన శుభాకాంక్షలు చెబుతోంది తుపాకి.కామ్.


Like Us on Facebook : https://www.facebook.com/Tupakidotcom/