రూమర్స్ కు చెక్ పెట్టిన 'భీమ్లా నాయక్'

వకీల్ సాబ్' సినిమా తర్వాత పవన్ కల్యాణ్ నటిస్తున్న రీమేక్ ''భీమ్లా నాయక్''. ఇందులో రానా దగ్గుబాటి మరో హీరోగా నటిస్తుండగా.. పవన్ భార్యగా నిత్యా మీనన్ నటిస్తోంది. మలయాళ బ్లాక్ బస్టర్ 'అయ్యప్పనుమ్ కొశీయుమ్' చిత్రానికి కొన్ని మార్పులు చేర్పులు చేసి త్రివిక్రమ్ శ్రీనివాస్ ఈ స్క్రిప్ట్ రెడీ చేశారు. సాగర్ కె చంద్ర దర్శకత్వం వహిస్తున్నారు. ఈ చిత్రాన్ని వచ్చే ఏడాది సంక్రాంతి బరిలో నిలపనున్నట్లు మేకర్స్ ఇది వరకే ప్రకటించారు. అయితే ఈ చిత్రాన్ని ఓటీటీలో రిలీజ్ చేయడానికి నిర్మాతలు సుముఖంగా ఉన్నారని.. ఇప్పటికే బేరసారాలు జరుగుతున్నాయని రూమర్స్ వచ్చాయి.

ఈ నేపథ్యంలో 'భీమ్లా నాయక్' చిత్రాన్ని థియేటర్లలోనే విడుదల చేయనున్నట్లు చిత్ర నిర్మాతలు సోషల్ మీడియా వేదికగా వెల్లడించారు. ఎట్టిపరిస్థితుల్లోనూ ఈ సినిమాని 2022 జనవరి 12వ తేదీన విడుదల చేయనున్నట్లు తెలిపారు. దీంతో పవన్ కళ్యాణ్ సినిమాని డైరెక్ట్ ఓటీటీలో రిలీజ్ చేస్తున్నారనే రూమర్స్ కు చెక్ పడింది. కాగా, నిజాయితీ గల పోలీస్ ఆఫీసర్ - రిటైర్డ్ హవల్దార్ మధ్య అహం ఆత్మ గౌరవం వల్ల ఏర్పడిన పరిణామాల కథాంశంతో ఈ చిత్రాన్ని రూపొందిస్తున్నారు.

ఇప్పటికే విడుదలైన 'భీమ్లా నాయక్' ఫస్ట్ గ్లిమ్స్ - ఫస్ట్ సాంగ్ మంచి స్పందన తెచ్చుకున్నాయి. ఈ చిత్రానికి థమన్ సంగీతం సమకూరుస్తున్నారు. రవి కె చంద్రన్ సినిమాటోగ్రఫీ అందించగా.. ఏఎస్ ప్రకాష్ ఆర్ట్ డైరెక్టర్ గా వర్క్ చేస్తున్నారు. నవీన్ నూలి ఎడిటింగ్ బాధ్యతలు స్వీకరించారు. పీడీవీ ప్రసాద్ సమర్పణలో సితార ఎంటర్టైన్మెంట్స్ బ్యానర్ పై సూర్య దేవర నాగవంశీ ఈ చిత్రాన్ని నిర్మిస్తున్నారు.