రామారావు Vs రామ్ చ‌ర‌ణ్.. ఎవ‌రితో ముందు?

ఆరంగేట్ర‌మే డెబ్యూ హీరోకి 100 కోట్ల క్ల‌బ్ సినిమాని అందించాడు. అత‌డి ప‌నితీరుకు మేకింగ్ ఎబిలిటీకి ప‌రిశ్ర‌మ ప్ర‌ముఖులంతా స్ట‌న్న‌య్యారు. అత‌డు ఎలాంటి స్టార్ హీరోని అయినా హ్యాండిల్ చేయ‌గ‌లిగే గొప్ప ఎబిలిటీ ఉన్న ద‌ర్శ‌కుడు అంటూ కీర్తించేశారు. అంతేకాదు స్టార్ హీరోలు త‌న‌ని పిలిపించుకుని మ‌రీ సింగిల్ లైన్ క‌థ‌లు విన్నారు. కానీ ఎందుక‌నో ఇప్పుడు ఆ ట్యాలెంటెడ్ డైరెక్ట‌ర్ ఏళ్ల‌కు ఏళ్లు త‌న రెండో సినిమా కోసం ఎదురు చూడాల్సి వ‌స్తోంది. ఇదంతా ఎవ‌రి గురించి అంటే సుకుమార్ శిష్యుడు ప్ర‌తిభావంతుడు బుచ్చిబాబు స‌నా గురించే.

ఆరంగేట్ర‌మే `ఉప్పెన‌`తో మెగా మేన‌ల్లుడు వైష్ణ‌వ్ తేజ్ ని బెస్ట్ డెబ్యూగా రికార్డులెకెక్కించాడు. వంద కోట్ల క్ల‌బ్ హీరోగా నిల‌బెట్టాడు. ఆ త‌ర్వాత రామ్ చ‌ర‌ణ్ .. ఎన్టీఆర్ ..బ‌న్నీ లాంటి స్టార్ల‌కు బుచ్చిబాబు క‌థ‌లు చెబుతున్నాడ‌ని క‌థ‌నాలొచ్చాయి.  ఉప్పెన త‌ర్వాత అతను వెంటనే ఎన్టీఆర్ నుండి స్క్రిప్టు ప‌రంగా ఆమోదం పొందాడు. ఈ చిత్రం కబడ్డీ ఆధారంగా స్పోర్ట్స్ డ్రామా అని గుస‌గుస‌లు వినిపించాయి. `పెద్ది` అనే టైటిల్ ను పరిశీలిస్తున్నారని కూడా టాక్ వినిపించింది.

కానీ ఈ మూవీ సెట్స్ కెళ్లేందుకు బుచ్చిబాబు ఇంకా చాలా స‌మ‌యం వేచి ఉండాల్సి ఉంటుంది. ఎన్టీఆర్ వ‌రుస‌గా భారీ చిత్రాలతో బిజీ కావ‌డంతో బుచ్చిబాబు తన తదుపరి చిత్రం విషయంలో అయోమయంలో పడ్డాడు. కానీ తార‌క్ క‌మిట్ మెంట్ ఇస్తే వెనుదిరిగేది లేదు క‌నుక‌ బుచ్చిబాబుకు ఇది భ‌రోసా. `పెద్ది` సినిమా చేస్తానని ఎన్టీఆర్ మాట ఇవ్వడంతో ఆ యువ దర్శకుడు మరో స్క్రిప్ట్ పై కసరత్తు మొదలుపెట్టాడ‌ని స‌మాచారం.

ఇటీవ‌ల చ‌ర‌ణ్ కి మ‌రో కొత్త‌ లైన్ వినిపించి బుచ్చిబాబు ఒప్పించాడు. పూర్తి స్క్రిప్టును రెడీ చేయాల్సిందిగా చెర్రీ గ్రీన్ సిగ్న‌ల్ ఇచ్చేశారు. కానీ చ‌ర‌ణ్ కూడా వ‌రుస చిత్రాల‌తో బిజీగా ఉన్నారు. ప్ర‌స్తుతం శంక‌ర్ తో భారీ చిత్రం ఆర్.సి 15ని పూర్తి చేస్తూనే త‌దుప‌రి కేజీఎఫ్ డైరెక్ట‌ర్ ప్ర‌శాంత్ నీల్ తో సినిమా చేయాల‌ని ఉవ్విళ్లూరుతున్నారు. ఒక‌వేళ బుచ్చిబాబుతో ముందుకు వెళ్లాలంటే కేజీఎఫ్ రేంజు క‌థ‌నే అత‌డు చెప్పాల్సి ఉంటుంద‌న్న సందేహాలున్నాయి. చ‌ర‌ణ్ పాన్ ఇండియా స్టార్ డ‌మ్ తో పాటు తార‌క్ పాన్ ఇండియా స్టార్ డ‌మ్ కూడా కొంత ఇబ్బందిక‌ర‌మే.

ఆ ఇద్ద‌రి రేంజుకు త‌గ్గ‌ట్టు పాన్ ఇండియా స్క్రిప్టుతోనే బుచ్చిబాబు సిద్ధంగా ఉండాల్సి ఉంటుంద‌ని అంచ‌నా వేస్తున్నారు. ఒక‌వేళ లోక‌ల్ స్ట‌ఫ్ తో మాత్ర‌మే స్క్రిప్టును తీర్చిదిద్దితే అది ముందుకు వెళ్లేందుకు ప్ర‌తిబంధ‌కంగా మార‌నూవ‌చ్చు. ప్ర‌స్తుతానికి బుచ్చిబాబు స్క్రిప్ట్ లు పూర్తి చేసి తార‌క్.. చరణ్ రాక కోసం వెయిట్ చేయాల్సి ఉంది. చ‌ర‌ణ్ తో మైత్రీ మూవీ మేకర్స్ భారీ సినిమా నిర్మించనుంది.

ప్రస్తుతానికి బుచ్చిబాబు ఏ ప్రాజెక్ట్ ముందుగా స్టార్ట్ అవుతుందనే విషయంపై క్లారిటీ లేదు. ఇప్ప‌టికి రామ్ చరణ్ స్క్రిప్ట్ పైనే ప‌ని చేస్తున్నాడు. ఇది ఎలాంటి క‌థాంశంతో తెర‌కెక్కుతుంది? అన్న‌దానిపై క్లారిటీ రావాల్సి ఉంది.