ఆచార్య కోసం రాజమౌళిని రిక్వెస్ట్‌ చేశాం : చిరంజీవి

మెగాస్టార్‌ చిరంజీవి ఆచార్య సినిమాలో చరణ్‌ నటిస్తున్న విషయమై ఇప్పటికే కన్ఫర్మ్‌ అయ్యింది. కరోనా కారణంగా అన్ని సినిమాల ప్లాన్స్‌ తలకిందులు అయ్యాయి. కనుక ఆర్‌ఆర్‌ఆర్‌ సినిమా షూటింగ్‌ కారణంగా ఆచార్య సినిమాకు చరణ్‌ డేట్లు ఇవ్వడం సాధ్యం అవుతుందా అనే అనుమానం మళ్లీ మొదలైంది. చరణ్‌ పాత్ర విషయంపై మళ్లీ అనుమానాలు వ్యక్తం అవుతున్న నేపథ్యంలో మెగాస్టార్‌ చిరంజీవి తాజాగా ఒక ఇంటర్వ్యూలో ఫుల్‌ క్లారిటీ ఇచ్చారు. ఆచార్య సినిమాలో చరణ్‌ నటించబోతున్నాడు. అందుకోసం రాజమౌళిని రిక్వెస్ట్‌ చేశాం.

చరణ్‌ మరియు నేను కలిసి నటించాలనేది సురేఖ కోరిక. ఆమె కోసం ఆచార్య సినిమాలో ఇద్దరం కలిసి నటించబోతున్నాం. ఇలాంటి కథ మళ్లీ వస్తుందో రాదో తెలియదు. అందుకే ఖచ్చితంగా ఈ సినిమాలోనే ఇద్దరం కలిసి నటించాలని అనుకున్నాం. అందుకోసం రాజమౌళిని రిక్వెస్ట్‌ చేసి మరీ చరణ్‌ డేట్లు ఇవ్వమని కోరాం అంటూ చిరంజీవి పేర్కొన్నారు. ఆచార్య సినిమాలో ఆ పాత్రను చరణ్‌ చేస్తేనే బాగుంటుంది. అందుకే ఆలస్యం అయినా కూడా చరణ్‌ తోనే ఆ పాత్ర చేయించాలని దర్శకుడు కొరటాల శివ భావిస్తున్నాడట.

ఆర్‌ఆర్‌ఆర్‌ సినిమా షూటింగ్‌ కు ఇబ్బంది లేకుండా ఆచార్య సినిమాలో చరణ్‌ నటించబోతున్నాడు. వచ్చే ఏడాది ఏప్రిల్‌ వరకు సినిమా షూటింగ్‌ ను పూర్తి చేస్తామంటూ చిరంజీవి పేర్కొన్నారు. వచ్చే ఏడాది సమ్మర్‌ లోనే ఈ సినిమాను విడుదల చేయాలని భావిస్తున్నారట. ఈ చిత్రంలో చిరంజీవికి జోడీగా కాజల్‌ అగర్వాల్‌ ఇప్పటికే కన్ఫర్మ్‌ అవ్వగా చరణ్‌ కు జోడీగా రష్మిక మందన్న నటించబోతున్నట్లుగా వార్తలు వచ్చాయి.