నలుగురు భామలతో అతని సినిమా

సినిమా మేకింగ్ లో డైరెక్టర్ తరవాత అంత కష్టపడేది... తపన పడేది కచ్చితంగా సినిమాటోగ్రాఫర్లే. ఏ సీన్ తీయాలో డైరెక్టర్ నెరేట్ చేయగానే ఎలా తీయాలి.. ఏ లైటింగ్ లో తీయాలి.. సీన్ లో అనుకున్న మూడ్ తెరపై కనిపించాలంటే ఏం చేయాలన్నది సినిమాటోగ్రాఫర్ కు గట్టి పట్టు ఉంటేనే ప్రేక్షకుడు సీన్ లోని ఇంటెన్సిటీ ఫీల్ అవగలిగేది. కొన్ని సినిమాలు దృశ్యకావ్యాల్లా మిగిలిపోయాయంటే.. అందులో సినిమాటోగ్రాఫర్ల కష్టం చాలానే ఉంది.

సినిమాటోగ్రాఫర్లుగా రాణిస్తున్న వారు చాలామందే ఉన్నా రైటర్లలాగా మరోమెట్టు ఎక్కి డైరెక్టర్ అవాలని ఆశపడే సినిమాటోగ్రాఫర్లు కాస్తంత తక్కువే. మారుతి డైరెక్షన్ లో వచ్చి బంపర్ హిట్ కొట్టిన మహానుభావుడు - భలేభలే  మగాడివోయ్ సినిమాలకు కెమెరా మెన్ గా పనిచేసిన నిజార్ షఫీ త్వరలో డైరెక్టర్ అవతారం ఎత్తాడు. ఇతడి డైరెక్షన్ లో వస్తున్న సినిమా చడీచప్పుడు లేకుండా స్టార్టయి షూటింగ్ కూడా అయిపోతుందని తెలుస్తోంది. తెలుగు - తమిళ భాషల్లో ఒకేసారి తెరకెక్కుతున్న ఈ సినిమా డీటైల్స్ త్వరలోనే బయటపెడతామని సినిమా యూనిట్ లోని సభ్యుడు ఒకరు తెలిపారు.

థ్రిల్లర్ ప్రధాన ఎలిమెంట్ గా వస్తున్న ఈ సినిమాలో ఓ ఇన్విస్టిగేషన్ తరహాలో స్క్రీన్ ప్లే ఉంటుందని తెలుస్తోంది. ‘‘ఈ మూవీలో నలుగురు భామలు ప్రధాన పాత్రలు చేస్తున్నారు. అంజలి - అనీషా ఆంబ్రోస్ - నందిత శ్వేత - శ్రద్ధ శ్రీనాథ్ ఈ నాలుగు పాత్రలు చేస్తున్నట్లు తెలిసింది. ఈ నలుగురు క్యారెక్టర్ల చుట్టూనే కథ తిరుగుతుంది. త్వరలోనే ఈ సినిమాకు సంబంధించి మరిన్ని విశేషాలు రివీల్ అవుతాయని’’ ఈ మూవీ యూనిట్ సభ్యుడు  చెప్పుకొచ్చారు.