గ్రౌండ్ నుండి థియేటర్లో అడుగుపెడుతున్న ఫేమస్ క్రికెటర్

ఇండియన్ క్రికెటర్ హర్భజన్ సింగ్.. హీరో అవతారం ఎత్తనున్నాడు. ఇన్నాళ్లు గ్రౌండ్‌లో చూపించిన భజ్జీ టాలెంట్ ఇక వెండితెర పై నటనలో చూపించనున్నాడు. ఈ విషయాన్ని స్వయంగా తానే సోషల్ మీడియాలో పంచుకున్నాడు. అంతేగాక తను నటించనున్న సినిమా పోస్టర్‌ను తన సోషల్ మీడియాలో షేర్ చేశాడు. భజ్జీ భాయ్ హీరోగా తెరకెక్కుతున్న సినిమా 'ఫ్రెండ్‌షిప్'. అయితే అది తమిళ సినిమా కావడం విశేషం. ఈ సినిమాకు జాన్ పాల్ రాజ్, షామ్ సూర్య దర్శకత్వం వహిస్తున్నారు. జేపీఆర్ స్టాలిన్ ఈ సినిమాను నిర్మిస్తున్నారు. భజ్జి విడుదల చేసిన పోస్టర్ లో ఇద్దరు వ్యక్తుల చేతులకు బేడీలు వేసి ఉంది.

దక్షిణ భారతీయ సినిమాలో ఓ క్రికెటర్ ప్రధాన పాత్రలో నటిస్తున్నట్లు భజ్జి పోస్ట్ చేసిన పోస్టరులో రాసి ఉంది. ఈ ఏడాది థియేటర్లలో కూడా సందడి చేయనుందట. అయితే భజ్జి నటీ గీతా బస్రాను వివాహం చేసుకున్న సంగతి తెలిసిందే. గతంలో గీతాబస్రా నటించిన 'సెకండ్ హ్యాండ్ హస్బెండ్' సినిమాలో కూడా హర్భజన్ ఓ కీలక పాత్ర నటించాడు. హర్భజన్ సింగ్ సినిమాల్లోకి రావడానికి భార్య గీత కూడా కారణమని తెలుస్తోంది. క్రికెట్ లో రాణించిన భజ్జి థియేటర్స్‌లో ప్రేక్షకులను ఎలా అలరిస్తాడో చూడాలి.. అయితే బాలీవుడ్‌లో ఎప్పుడు అడుగుపెడుతున్నారనే ప్రశ్నకు భజ్జీ సరదాగా.. ‘‘బాలీవుడ్‌ సినిమాలను ఖాన్‌లకు వదిలేస్తున్నాను.. నాకు తమిళ, పంజాబీ సినిమాలు చాలు’’ అని నవ్వుతూ బదులిచ్చాడు.