‘దండుపాళ్యం’ దర్శకుడి మరో సంచలనం

తెలుగువాడైన శ్రీనివాసరాజు పేరు ఐదేళ్ల కిందట కన్నడ నాట మార్మోగిపోయింది. దండుపాళ్య అనే ఊరికి చెందిన సైకో థ్రిల్లర్ బృందం చేసిన హత్యల నేపథ్యంలో వాస్తవ ఘటనల ఆధారంగా అతను రూపొందించిన ‘దండుపాళ్య’ సినిమా కన్నడలో సంచలన విజయం సాధించింది. దేశవ్యాప్తంగా ఈ చిత్రం చర్చనీయాంశంగా మారింది. ఒళ్లు గగుర్పొడిచే రీతిలో రియలిస్టిగ్గా ఈ చిత్రాన్ని రూపొందించిన తీరు ఆ తరహా సినిమాల్ని ఇష్టపడే ప్రేక్షకుల్ని ఆకట్టుకుంది. ఈ చిత్రం ‘దండుపాళ్యం’ పేరుతో తెలుగులోనూ విడుదలై ఇక్కడా ఆదరణ పొందింది. దీనికి కొనసాగింపుగా ‘దండుపాళ్యం-2’ కూడా తీశాడు శ్రీనివాసరాజు. త్వరలోనే ఇది ప్రేక్షకుల ముందుకు రానుంది.

దీని తర్వాత మరో సంచలన చిత్రానికి శ్రీకారం చుట్టనున్నాడు శ్రీనివాసరాజు. కంచి పీఠం మాజీ అధిపతి ఆచార్య జయేంద్ర సరస్వతి అప్పట్లో ఓ హత్య కేసులో చిక్కుకోవడం సంచలనం రేపిన సంగతి తెలిసిందే. ఆ కేసు వెనుక చాలా తతంగం ఉన్నట్లుగా అప్పట్లో కథనాలు వచ్చాయి. కొన్ని నెలల పాటు మీడియాలో ప్రముఖంగా ఉన్న ఈ కేసు.. ఆ తర్వాత మరుగున పడిపోయింది. ఈ కేసు వెనుక ఉన్న చీకటి కోణాల నేపథ్యంలో శ్రీనివాసరాజు ‘ఆచార్య అరెస్ట్’ అనే సినిమా చేయబోతున్నట్లు ప్రకటించాడు. దీనికి ‘ఇన్సల్ట్ టు ద హిందు’ అనే క్యాప్షన్ కూడా జోడించడాన్ని బట్టి ఇది వివాదాలకు దారితీయబోతోందనే సంకేతాలిచ్చేశాడు శ్రీనివాసరాజు. ప్రకటనతోనే చర్చనీయాంశంగా మారిన ‘ఆచార్య అరెస్ట్’ విడుదల సమయానికి మరింతగా హాట్ టాపిక్ అవ్వడం ఖాయం.