కేరళ పోలీసులు బన్నీని భలేగా వాడేశారుగా?

పోలీసులు రూటు మార్చేశారు. గతానికి భిన్నంగా జనాలకు అర్థమయ్యేలా వారికి నచ్చేలా విషయాల్ని చెప్పటం మొదలు పెట్టారు. అంతేనా.. తమకున్న ఇమేజ్ ను మార్చుకునే విషయంలోనూ వారు కొత్త పద్దతుల్ని అనుసరిస్తున్నారు. తాజాగా కేరళ పోలీసులు చేసిన ప్రయత్నమే దీనికి నిదర్శనం. ప్రజలకు తాము ఎంతలా అండగా ఉంటామన్న విషయాన్ని చెప్పేందుకు.. వారు ఒక వీడియోను రూపొందించారు. అందులో అల్లు అర్జున్ ను  నటించిన రూసుగుర్రం సినిమాలోని సీన్ ను వాడేయటం గమనార్హం.

ప్రజలను కాపాడే విషయంలో తాము ఎంత అప్రమత్తంగా ఉంటామన్న విషయాన్ని తెలియజేయటంతో పాటు.. వారి రక్షణ కోసం తీసుకొచ్చిన పోలీస్ యాప్ ప్రచారం కోసం బన్నీ సినిమాను వాడేశారు. కేరళలో బన్నీకి భారీ ఎత్తున ఫ్యాన్స్ ఉండటం తెలిసిందే. బన్నీకి ఉన్న ఫాలోయింగ్ ను వాడేందుకు డిసైడ్ అయిన పోలీసులు.. రేసుగుర్రంలోని ఒక సీన్ తో ఒక వీడియోను రూపొందించారు.

ఈ వీడియోలో హీరో కుటుంబం ఒక వాహనంలో చిక్కుకుపోవటం.. దాని నుంచి బయటకు రావటానికి ప్రయత్నిస్తున్న వేళ.. విలన్లు మరో వాహనంలో దాన్ని బలంగా ఢీ కొనేందుకు ప్రయత్నిస్తుంటారు. ఆ క్రమంలో వాయువేగంతో పోలీస్ డ్రెస్ లో వచ్చే బన్నీని చూసి విలన్లు హడలిపోయి సడన్ బ్రేక్ వేస్తారు. అలా హీరో తన కుటుంబాన్ని రక్షించుకుంటాడు. ఈ సీన్ ను అక్కడితో కట్ చేస్తే.. కేరళ పోలీసులు తీసుకొచ్చిన పోల్ యాప్ కింద అన్నీశాఖల్ని అందుబాటులోకి తీసుకొచ్చామని.. ప్రమాద సమయంలో ఈ యాప్ ను వినియోగిస్తే.. క్షణాల వ్యవధిలో ఘటనాస్థలానికి చేరుకుంటామని చెప్పటానికి ఈ వీడియోను రూపొందించారు. ఇదంతా చూసిన బన్నీ అభిమానులు.. తమ హీరోను తెలుగు పోలీసులు వాడకున్నా..కేరళ పోలీసులు వాడేశారంటున్నారు.