దిల్ రాజు.. ఓ రేంజిలో ప్లాన్ చేశాడు

దువ్వాడ జగన్నాథం.. దిల్ రాజుకు ప్రతిష్టాత్మకమైన సినిమా. ఆయన బేనర్లో తెరకెక్కుతున్న 25వ సినిమా ఇది కావడం విశేషం. అందుకే దీన్ని ఆయన చాలా ప్రత్యేకంగా భావిస్తున్నారు. సినిమా మొదలుపెట్టినప్పటి నుంచి దీనిపై ప్రత్యేక శ్రద్ధ పెడుతున్నారు. రాజు బేనర్లో ఈ సినిమాకు ఖర్చు పెట్టినంతగా దేనికీ ఖర్చు చేయలేదు. దీని బట్జెట్ రూ.60 కోట్లు దాటినట్లు సమాచారం. ఎక్కడా రాజీ పడకుండా ఈ సినిమాను ప్రొడ్యూస్ చేస్తున్నాడు రాజు. ‘డీజే’ ప్రమోషన్ కూడా కొంచెం గట్టిగానే చేస్తున్నాడు. ఈ సినిమాపై ఇప్పటికే అంచనాలు భారీ స్థాయిలో ఉన్నప్పటికీ ప్రమోషన్ విషయంలో అస్సలు తగ్గట్లేదు.

మొన్న ట్రైలర్ రిలీజ్ ఎంత ఘనంగా జరిగిందో తెలిసిందే. దిల్ రాజు బేనర్లో పని చేసిన ప్రతి దర్శకుడినీ పిలిచి.. అందరి చేతుల మీదుగా ట్రైలర్ లాంచ్ చేయించాడు రాజు. ఇక ముందు కూడా ప్రమోషన్ హంగామా ఎక్కువే ఉండబోతోందట. ఈ చిత్రానికి ఆడియో ఫంక్షన్ తో పాటు ప్రి రిలీజ్ ఈవెంట్ కూడా చేయబతోతున్నాడట రాజు. ఈ నెల 11న ఆదివారం అంగరంగ వైభవంగా ఆడియో వేడుకను చేయడానికి రాజు సన్నాహాలు చేస్తున్నాడు. ఇండస్ట్రీలోని అతిరథ మహారథులు ఈ వేడుకకు హాజరవుతారట. ఈ వేడుకకు అభిమానుల్ని పరిమిత సంఖ్యలోనే అనుమతిస్తారట. దీని తర్వాత ఫ్యాన్స్ కోసం ప్రత్యేకంగా.. కొంచెం పెద్ద స్థాయిలో ప్రి రిలీజ్ ఈవెంట్ చేస్తారట. అందుకోసం బహిరంగ సభా ప్రాంగణాన్ని ఎంచుకుంటారని సమాచారం. ఆ వేడుక సినిమా విడుదలకు ఆరు రోజుల ముందు.. అంటే జూన్ 18న జరగబోతోంది. మొత్తానికి ఇప్పటికే ‘డీజే’పై ఉన్న బజ్ ఈ వేడుకల తర్వాత మరింత పెరిగే అవకాశాలున్నాయి.

Like Us on Facebook : https://www.facebook.com/Tupakidotcom/