ప‌వ‌న్ త‌ర్వాత గోవిందుడేన‌ని తేల్చేశారు

టాలీవుడ్‌లో సంచ‌ల‌నం ప‌వ‌న్ క‌ల్యాణ్. ఆ పేరును ప్ర‌స్తావించినంత‌నే జ‌నాల్లో ఏదో వైబ్రేష‌న్ వ‌చ్చేసే ప‌రిస్థితి. ఆయ‌న సినిమాల‌కు దూర‌మ‌య్యారు. ప్ర‌జా జీవితంలోకి వెళ్లారు. మ‌రి.. ఆయ‌న వార‌సుడు ఎవ‌రు?  ఇలాంటి ప్ర‌శ్న‌ల‌కు సాధారణంగా స‌మాధానాలు ఉండ‌వు.ఆ మాట‌కు వ‌స్తే.. ఇలాంటి ప్ర‌శ్న‌లు కూడా ఉండ‌వు.

కానీ.. అందుకు భిన్నంగా విజ‌య్ దేవ‌ర‌కొండ‌ను ప‌వ‌న్ వార‌సుడిగా పోల్చిన వైనం ఇప్ప‌టివ‌ర‌కూ సోష‌ల్ మీడియాలో చూశాం. ఇప్పుడు బ‌హిరంగ వేదిక‌ల మీదా.. అందునా మెగా ఫ్యామిలీనే అధికారికంగా ప్ర‌క‌టించ‌టం ఆస‌క్తిక‌రంగా మారింది. త‌న వ‌రుస చిత్రాల‌తో క‌లెక్ష‌న్ల దుమ్ము రేపుతున్న విజ‌య్ దేవ‌ర‌కొండ తాజా మూవీ గీతాగోవిందం చిత్ర స‌క్సెస్ మీట్ తాజాగా జ‌రిగింది.

ఈ కార్య‌క్రమానికి మెగాస్టార్ చిరంజీవితో పాటు ప‌లువురు ప్ర‌ముఖులు హాజ‌ర‌య్యారు. ఖైదీతో త‌న‌కు స్టార్ స్టేట‌స్ వ‌చ్చిన‌ట్లే గీతాగోవిందంతో విజ‌య్ స్టార్ అయ్యాడు. ఇప్పుడు టాప్ స్టార్స్ లో అత‌నూ ఒక‌డ‌య్యాడు.. అత‌న్ని స్వాగ‌తిస్తున్నా అంటూ చిరు తేల్చేశారు. ప్రేక్ష‌కుల కేరింత‌ల్ని త‌ల‌లో కాకుండా గుండెల్లో పెట్టుకుంటే.. వాళ్లూ త‌న‌ని గుండెల్లో పెట్టుకుంటార‌ని.. ఇండ‌స్ట్రీకి ద‌క్కిన మ‌రో అరుదైన వ‌ర్స‌టైల్ స్టార్ విజ‌య్ దేవ‌ర‌కొండ అంటూ అల్లు అర‌వింద్ మ‌రో స‌ర్టిఫికేట్ ఇచ్చేశారు.

ఇక‌.. ప్ర‌ముఖ నిర్మాత.. సెల‌బ్రిటీ స్టేట‌స్ ఉన్న దిల్ రాజు మాట్లాడుతూ.. గ‌డిచిన 15 ఏళ్ల‌లో మ‌హేశ్‌ బాబు.. ప్ర‌భాస్.. ఎన్టీఆర్.. రామ్ చ‌ర‌ణ్.. బ‌న్నీ స్టార్స్ అయ్యార‌ని.. 20 ఏళ్ల క్రితం తొలిప్రేమ‌తో ప‌వ‌న్ క‌ల్యాణ్ సంచ‌ల‌నం సృష్టించార‌ని.. ఆ త‌ర్వాత త‌న‌కు అలా క‌నిపించింది విజ‌యే అని చెప్ప‌టం ద్వారా.. ప‌వ‌న్ వార‌సుడు విజ‌య్ అని తేల్చేసిన‌ట్లైంది.