తండేల్.. సుష్మా స్వరాజ్ కూతురికి స్పెషల్ థ్యాంక్స్.. ఎందుకంటే

టాలీవుడ్ యంగ్ హీరో నాగచైతన్య, నేచురల్ బ్యూటీ సాయి పల్లవి కాంబోలో తెరకెక్కుతున్న తండేల్ మూవీపై ఆడియన్స్ లో ఎలాంటి అంచనాలు ఉన్నాయో అందరికీ తెలిసిందే. అనౌన్స్మెంట్ నుంచి మంచి బజ్ సొంతం చేసుకున్న తండేల్ మూవీ కోసం ఇప్పుడు సినీ ప్రియులు ఎంతో ఈగర్ గా వెయిట్ చేస్తున్నారు.

శ్రీకాకుళం జిల్లాలోని ఓ గ్రామంలో జరిగిన నిజ జీవిత ఘటన ఆధారంగా చందూ మొండేటి తెరకెక్కిస్తున్నారు. 2017-2018 మధ్యలో ఉపాధి కోసం గుజరాత్ వెళ్లారు కొందరు మత్స్యకారులు. అక్కడ ఓ కంపెనీ తరఫున వేటకు వెళ్లి.. అనుకోకుండా పాకిస్తాన్ పరిధిలోకి వెళ్లిపోయారు. దీంతో వారిని పాక్ అధికారులు అరెస్ట్ చేశారు.

అనంతరం వారిని జైలుకు పంపగా.. కొన్ని నెలలపాటు జైలులోనే ఉండిపోయారు. అప్పుడు వారిని విడిపించాలని ఏపీ ప్రభుత్వం.. అప్పటి కేంద్ర విదేశీ వ్యవహారాల శాఖ మంత్రి సుష్మా స్వరాజ్‌ ను సంప్రదించింది. దీంతో పాక్ సర్కార్ తో చర్చలు జరిపి ఆమె విడిపించారు. ఇప్పుడు ఆ ఘటన ఆధారంగా తండేల్ మూవీ రూపుదిద్దుకుంటోంది.

దీంతో ఇప్పుడు సినిమాలో సుష్మా స్వరాజ్ కృషిని కచ్చితంగా కొనియాడి ఉంటారు తండేల్ మేకర్స్. ఆ విషయంపై తాజాగా మూవీ నిర్మాత బన్నీ వాసు సోషల్ మీడియాలో పోస్ట్ పెట్టారు. సుష్మాస్వరాజ్ కుమార్తె, ఎంపీ బన్సూరీ స్వరాజ్ తో దిగిన ఫోటోను నెట్టింట షేర్ చేశారు. అదే సమయంలో ఆమెకు స్పెషల్ థ్యాంక్స్ తెలిపారు.

"2017- 2018లో పాకిస్తాన్ జైలులో చిక్కుకున్న మత్స్యకారులు తిరిగి భారత్ కు తీసుకురావడంలో మాజీ కేంద్ర మంత్రి సుష్మా స్వరాజ్ గారు చేసిన అద్భుతమైన కృషిని ప్రదర్శించడానికి మాకు అవకాశం ఇచ్చినందుకు బన్సూరీ స్వరాజ్ గారికి హృదయపూర్వక కృతజ్ఞతలు. సుష్మా స్వరాజ్ గారి పేరును ఉపయోగించుకునేందుకు అనుమతులు ఇవ్వడం ద్వారా మీ మద్దతు చాలా ఉందని అర్ధమవుతుంది" అంటూ ప్రొడ్యూసర్ బన్నీ వాసు రాసుకొచ్చారు.

ఇక సినిమా విషయానికొస్తే.. జీఏ 2 ఆర్ట్స్ బ్యానర్ పై ప్రముఖ నిర్మాత అల్లు అరవింద్ సమర్పిస్తుండగా.. బన్నీ వాసు గ్రాండ్ గా నిర్మిస్తున్నారు. రాక్ స్టార్ దేవిశ్రీ ప్రసాద్ మ్యూజిక్ అందిస్తున్నారు. ఇప్పటికే సినిమా నుంచి వచ్చిన మూడు పాటలు అద్భుతమైన హిట్స్ గా నిలిచాయి. మరి ఫిబ్రవరి 7వ తేదీన విడుదల అవ్వనున్న తండేల్ చిత్రం లాంటి హిట్ అవుతుందో వేచి చూడాలి.