పవన్ తో సినిమా చేయబోతున్నా-సంపత్ నంది

సంపత్ నంది.. ఈ పేరెత్తితే చాలామంది అయ్యో పాపం అంటారు. పవన్ కళ్యాణ్ తో గబ్బర్ సింగ్-2 సినిమా చేయడం కోసం రెండేళ్లు కష్టపడి.. చివరికి పవన్ తిరస్కారంతో బయటికి వచ్చేయడం చూసి చాలామంది అతడిపై జాలి చూపించారు. ఐతే అతను మాత్రం తనకు జరిగిన నష్టం గురించి పట్టించుకోకుండా వెంటనే మాస్ రాజా రవితేజతో ‘బెంగాల్ టైగర్’ సినిమా మొదలుపెట్టాడు. శరవేగంగా పూర్తి చేశాడు. విడుదలకు కూడా రెడీ చేశాడు. ఐతే పవన్ సినిమా విషయంలో తెర వెనుక ఏం జరిగింది.. ఆ ప్రాజెక్టు వల్ల తాను ఎంత నష్టపోయింది.. ఎప్పుడూ చెప్పలేదు సంపత్.

పవన్ గురించి ఎక్కడా ఒక్క మాట కూడా నెగెటివ్ గా మాట్లాడకుండా తన సంస్కారాన్ని చాటుకున్నాడు సంపత్. ఐతే లోలోన అసంతృప్తి ఉండే ఉంటుందని.. మళ్లీ పవన్ తో సినిమా అనే ప్రస్తావనే తేడని అని చాలామంది అనుకున్నారు కానీ.. సంపత్ మాత్రం పవన్ తో సినిమా చేసి తీరుతానని అంటున్నాడు. ‘బెంగాల్ టైగర్’ విడుదలకు సిద్ధమవుతున్న నేపథ్యంలో కుటుంబంతో కలిసి తిరుమలకు వెళ్లి శ్రీవారిని దర్శించుకున్న సంపత్.. అక్కడ విలేకరులతో మాట్లాడుతూ.. పవన్ తో తాను త్వరలోనే సినిమా చేస్తానని చెప్పాడు. మనం తర్వాత కలిసి పని చేద్దామని పవన్ హామీ ఇచ్చాడని.. తాను కూడా పవన్ కోసం వేరే కథ సిద్ధం చేశానని.. త్వరలోనే ఆ వివరాలు వెల్లడిస్తానని సంపత్ అన్నాడు. ఒకవేళ ‘బెంగాల్ టైగర్’ పెద్ద హిట్టయితే ఆ తర్వాత పవన్ తోనే సంపత్ సినిమా చేసినా ఆశ్చర్యం లేదేమో.