శ్రీరెడ్డికి తేజ రెండు ఛాన్సులు

తెలుగు పరిశ్రమలో కాస్టింగ్ కౌచ్ గురించి చాలా గట్టిగానే మాట్లాడింది శ్రీరెడ్డి. అవకాశాల పేరుతో తనను చాలా మంది వంచించారని ఆమె తీవ్ర ఆరోపణలు చేసింది. తనకు అన్యాయం చేసిన వాళ్లలో ఎందరో ప్రముఖులు ఉన్నారని ఆమె అంది. వాళ్ల పేర్లన్నీ బయటపెడతానంటూ ఇటీవలే ప్రకటించిన శ్రీరెడ్డి.. లీక్స్ మొదలయ్యాయంటూ మొన్న ఫేస్ బుక్ లో ఒక ఫొటో షేర్ చేసింది. అందులో శ్రీరెడ్డితో సన్నిహితంగా ఒక వ్యక్తి కనిపించారు. కానీ అతనెవరన్నది స్పష్టత లేదు. మరోవైపు అజయ్ కౌండిన్య అనే దర్శకుడి భండారం బయటపెడతానంటూ కూడా ఆమె హెచ్చరించింది. మరి శ్రీరెడ్డి ఎవరెవరి పేర్లు బయటపెడుతుందా అని జనాలు ఎదురు చూస్తుండగా.. ఆమెతో కలిసి సీనియర్ దర్శకుడు తేజ ఒక వీడియో ద్వారా జనాల ముందుకు రావడం విశేషం.

శ్రీరెడ్డి ఆరోపణలు విని ఆమెతో మాట్లాడాలనిపించి పిలిపించానని.. ఆమె చెప్పిందంతా విన్నాక తనకు అన్యాయం జరిగిందని తాను నమ్ముతున్నానని తేజ అన్నాడు. శ్రీరెడ్డికి తాను రెండు సినిమాల్లో అవకాశాలిస్తున్నట్లు తేజ ప్రకటించడం విశేషం. ప్రస్తుతం తేజ రెండు సినిమాలకు కమిటై ఉన్నాడు. నందమూరి బాలకృష్ణతో ‘యన్.టి.ఆర్’ బయోపిక్ తో పాటు విక్టరీ వెంకటేష్ తో ఒక సినిమా చేస్తున్నాడు. ఈ రెండు సినిమాల్లోనూ శ్రీరెడ్డికి పాత్రలు ఇస్తున్నాడట తేజ. మొత్తానికి శ్రీరెడ్డికి అవకాశాలిస్తామని చెప్పి చాలా మంది మోసం చేశారని ఆమె అంటుంటే.. తేజ మాత్రం ఆమె ఆవేదన విని.. రెండు పెద్ద సినిమాల్లో అవకాశాలిస్తుండటం విశేషమే. మరి ఈ సినిమాల్లో ఆమె పాత్రలెలా ఉంటాయో చూద్దాం.