'నిశ్శ‌బ్ధం' సౌండ్ పెంచేదెపుడు స్వీటీ?

భాగ‌మ‌తి త‌ర్వాత స్వీటీ అనుష్క బెంగుళూరుకే ప‌రిమిత‌మైంది. మ‌ధ్య‌లో ఒక‌సారి `సైరా: న‌ర‌సింహారెడ్డి` షూటింగ్ కోసం హైద‌రాబాద్ వ‌చ్చింది. త‌ర్వాత పూర్తిగా ఇంటికే ప‌రిమిత‌మైంది. అక్క‌డ నుంచే నిశ్శ‌బ్ధం షూటింగ్ కి హజ‌ర‌య్యేది. ఇటీవ‌లే ఈ సినిమా షూటింగ్ పూర్తిచేసి ఫ్రీ అయింది. ప్ర‌స్తుతం పోస్ట్ ప్రోడ‌క్ష‌న్ ప‌నులు జ‌రుగుతున్నాయి. హేమంత్ మ‌ధుక‌ర్ ద‌ర్శ‌క‌త్వం వ‌హిస్తోన్న ఈ చిత్రాన్ని జ‌న‌వ‌రి 31న రిలీజ్ చేయ‌డానికి ముహూర్తం ఫిక్స్ చేసారు. అంటే రిలీజ్ కు ఇంకా ఇర‌వై రోజులే స‌మ‌యం ఉంది. కానీ ఇప్ప‌టివ‌రకూ ప్ర‌చారం జీరో అయిపోవ‌డం చ‌ర్చ‌కొచ్చింది.

అటు స్వీటీ మీడియాకు దూరంగా ఉండ‌టం పైనా ర‌క‌రకాల క‌థ‌నాలు వెలువ‌డుతున్నాయి. దీంతో అనుష్క ఏమ‌నుకుందో? ఏమోగానీ మీడియాకి ట‌చ్ లోకి వ‌చ్చింది. త‌న సినిమా అప్ డేట్ ని వెల్ల‌డించి...సంక్రాంతి త‌ర్వాతి నుంచి ప్ర‌చారం అద‌ర‌ గొడ‌తాన‌ని తెలిపింది. ఈ సంక్రాంతి బెంగుళూరు లోనే త‌ల్లిదండ్రుల‌తో జ‌రుపుకుంటున్న‌ట్లు తెలిపింది. ప్ర‌తి సంక్రాంతిని ఏదో ఒక సినిమా షూటింగ్ వ‌ల్ల మిస్ అవ్వ‌డం సెల‌బ్రిటీల‌కు ప‌రిపాటే. అందుకే స్వీటీ ఈసారి మిస్ అవ్వ‌డం లేదుట‌. త‌ల్లి దండ్రుల‌తో సంక్రాంతి సంబురాల్లో మునిగి తేల‌డానికి రెడీ అవుతోంది.

ఇక సంక్రాంతి త‌ర్వాత అనుష్క హైద‌రాబాద్ లో రెక్క‌లు క‌ట్టుకుని వాలిపోతుంది. భాగ‌మ‌తి త‌ర్వాత పూర్తి స్థాయిలో  నిశ‌బ్ధం సినిమా ప్ర‌మోష‌న్ కార్య‌క్ర‌మాల్లో పాల్గొంటుంది. తెలుగు- త‌మిళ్ భాష‌ల్లో ఈ చిత్రాన్ని కోన ఫిల్మ్ కార్పోరేష‌న్- పీపుల్ మీడియా ఫ్యాక్ట‌రీ నిర్మిస్తున్నాయి. మాధ‌వ‌న్ - అంజ‌లి- సుబ్బ‌రాజు- షాలిని పాండే- అవ‌స‌రాల శ్రీనివాస్  కీల‌క పాత్ర పోషిస్తోన్న సంగ‌తి తెలిసిందే.