ప‌వ‌న్ సినిమాకు ఈడీ ఎఫెక్ట్

ప‌వ‌ర్‌స్టార్ ప‌వ‌న్‌ క‌ల్యాణ్ హీరోగా న‌టిస్తున్న పాన ఇండియా మూవీ `హ‌రి హ‌ర వీర‌మ‌ల్లు`. జాగ‌ర్ల‌మూడి క్రిష్ ఈ చిత్రాన్ని తెర‌కెక్కిస్తున్నారు. మెగా సూర్య ప్రొడ‌క్ష‌న్స్ బ్యాన‌ర్‌పై ఏ. ద‌యాక‌ర్ రావు తో క‌లిసి స్టార్ ప్రొడ్యూస‌ర్ ఏ.ఎం. ర‌త్నం ఈ చిత్రాన్ని నిర్మిస్తున్నారు. ప్ర‌స్తుతం ఈ మూవీ చిత్రీక‌ర‌ణ ద‌శ‌లో వుంది. కోవిడ్ కార‌ణంగా ఈ మూవీ షూటింగ్ కి అంత‌రాయం క‌లిగిన విష‌యం తెలిసిందే. ఇందులో ప‌వ‌ర్‌స్టార్ కి జోడీగా నిధి అగ‌ర్వాల్ న‌టిస్తున్న విష‌యం తెలిసిందే. అయితే ఈ చిత్రంలోని మ‌రో కీల‌క పాత్ర కోసం శ్రీ‌లంక‌న్ బ్యూటీ జాక్వెలిన్ ఫెర్నాండెజ్‌ ని చిత్ర బృందం ఇది వ‌ర‌కే ఫైన‌ల్ చేసింది.

అయితే తాజా ప‌రిణామాల నేప‌థ్యంలో ఆమెని ఈ సినిమా నుంచి చిత్ర బృందం త‌ప్పించేసింది. ఆమె స్థానంలో మ‌రో బాలీవుడ్ బ్యూటీ న‌ర్గీస్ ఫ‌క్రీని చిత్ర బృందం తాజాగా ఫైన‌ల్ చేసింది. ఇటీవ‌ల ఓ కేసులో జాక్వెలిన్ ఫెర్నాండెజ్ కు ఈడీ నోటీసులు జారీ చేయ‌డం హాట్ టాపిక్ గా మారిన విష‌యం తెలిసిందే. ఈ అంశాన్ని ప‌రిగ‌ణ‌లోకి తీసుకున్న చిత్ర బృందం జాక్వెలిన్ ని `హ‌రి హ‌ర వీర‌మ‌ల్లు` నుంచి  త‌ప్పించిన‌ట్టుగా తెలుస్తోంది.

అయితే ద‌ర్శ‌కుడు క్రిష్ మాత్రం ఆ వార్త‌ల్లో నిజం లేద‌ని, త‌న‌ని డేట్స్ స‌మ‌స్య కార‌ణంగా ఎప్పుడో తొలగించామ‌ని, ఆమె స్థానంలో మొఘ‌ల్ సామ్రాజ్యానికి చెందిన రోషనార పాత్ర కోసం న‌ర్గీస్ ఫ‌క్రీని తీసుకున్నామ‌ని చెబుతున్నారు. పిరియాడిక్ క‌థ‌తో 17వ శ‌తాబ్దం నేప‌థ్యంలో సాగే ఈ చిత్రంలో ప‌వ‌న్ క‌ల్యాణ్ రాబిన్ హుడ్ త‌ర‌హా పాత్ర‌లో క‌నిపించ‌బోతున్నారు. సినిమా ప్ర‌ధానంగా కోహినూర్ వ‌జ్రం నేప‌థ్యంలో సాగుతుంద‌ని వార్త‌లు వినిపిస్తున్నాయి. ఈ చిత్రం కోసం ప‌వ‌న్ ప్ర‌త్యేక యుద్ధ విద్య‌ల‌ని నేర్చుకుని ఈ పాత్ర కోసం సిద్ధ‌మైన విష‌యం తెలిసిందే.

ఎం.ఎం. కీర‌వాణి సంగీతం అందిస్తున్న ఈ చిత్రానికి జ్ఞాన శేఖ‌ర్ విఎస్ సినిమాటోగ్రాఫ‌ర్‌గా వ‌ర్క్ చేస్తున్నారు. బాలీవుడ్ న‌టుడు అర్జున్ రాంప‌ల్ కీల‌కమైన విల‌న్ గా క‌నిపించ‌నున్న ఈ చిత్రంలో ఆదిత్య‌మీన‌న్‌, శుభ‌లేఖ సుధాక‌ర్‌, పూజిత పొన్నాడ ఇత‌ర ప్ర‌ధాన పాత్ర‌ల్లో న‌టిస్తున్నారు. గ్రాఫిక్స్ ప్ర‌ధానంగా ప‌వ‌న్ కెరీర్‌లోనే అత్యంత భారీ బ‌డ్జెట్ తో రూపొందుతున్న ఈ చిత్రాన్ని వ‌చ్చే ఏడాది ఏప్రిల్‌లో ప్రేక్ష‌కుల ముందుకు తీసుకురానున్నార‌ట‌.