'ఫుల్ కిక్కు' సాంగ్: ఊర మాస్ ఎనర్జిటిక్ స్టెప్పులతో అదరగొట్టిన 'ఖిలాడి' జోడీ..!

మాస్ మహారాజ రవితేజ హీరోగా రమేష్ అవర్మ దర్శకత్వంలో తెరకెక్కుతున్న తాజా చిత్రం ''ఖిలాడి''. 'ప్లే స్మార్ట్' అనేది దీనికి ట్యాగ్ లైన్. రవితేజ డ్యూయల్ రోల్ పోషిస్తున్న ఈ యాక్షన్ ఎంటర్‌టైనర్ లో మీనాక్షి చౌదరి - డింపుల్ హయాతి హీరోయిన్లుగా నటిస్తున్నారు. ఇప్పటికే ఈ సినిమా నుంచి విడుదలైన పాటలన్నీ ప్రేక్షకులను విశేషంగా ఆకట్టుకొని యూట్యూబ్ లో మిలియన్ల వ్యూస్ రాబడుతున్నాయి. ఈ క్రమంలో నేడు రవితేజ పుట్టినరోజు కానుకగా 'ఫుల్ కిక్కు' అనే ఊర మాస్ సాంగ్ ని రిలీజ్ చేశారు.

'ఏందిరా అబ్బాయ్.. సిచ్యుయేషన్ ఏంటి?' అని రవితేజ అడగ్గా.. 'మాస్ సాంగ్ అన్నా.. మాస్ మహరాజ్ ఇక్కడ' అని చెప్పడంతో ''ఫుల్ కిక్కు'' పాట స్టార్ట్ అవుతుంది. 'నీ లిప్పులోంచి దూసుకొచ్చే ఫ్లైయింగ్ కిస్సు.. ఓ నిప్పు లాగా నన్ను తాకి పెంచెను పల్సు.. అది ఒంటిలోన చేసిన అల్లరి నీకేం తెల్సు.. ఫుల్ కిక్కూ' అంటూ సాగిన ఈ పాట మాస్ ఆడియన్స్ ని అలరిస్తోంది.

దేవిశ్రీ ప్రసాద్ ఈ స్పెషల్ ఫోక్ డ్యాన్స్ నంబర్ కు అదిరిపోయే ట్యూన్ కంపోజ్ చేశారు. డీఎస్పీ తమ్ముడు సాగర్ - మమతా శర్మ కలిసి ఈ పాటను ఎంతో హుషారుగా పాడారు. లిరిసిస్ట్ శ్రీమణి క్యాచీ లిరిక్స్ అందించారు. ప్రత్యేకమైన సెట్ లో షూట్ చేసిన ఈ సాంగ్ విజువల్ గా కలర్ ఫుల్ గా ఉంది.

'ఫుల్ కిక్కు' పాటలో రవితేజ - డింపుల్ హయతి కలిసి పోటాపోటీగా వేసిన మాస్ స్టెప్పులు ఆకట్టుకుంటున్నాయి. ఎనర్జిటిక్ డ్యాన్స్ మూవ్స్ వింటేజ్ మాస్ మహారాజాని గుర్తు చేస్తున్నాయి. హీరోహీరోయిన్ల కాస్ట్యూమ్స్ కూడా పాటకు తగ్గట్టుగానే ఉన్నాయి. శేఖర్ మాస్టర్ దీనికి కొరియోగ్రఫీ చేశారు. ''ఖిలాడి'' చిత్రానికి సుజిత్ వాసుదేవ్‌ మరియు జి.కె. విష్ణు సినిమాటోగ్రఫీ అందించారు. గాంధీ న‌డికుడిక‌ర్‌ ఆర్ట్ డైరెక్టర్ గా.. అమ‌ర్ రెడ్డి ఎడిట‌ర్‌ గా వర్క్ చేశారు.

''ఖిలాడి'' చిత్రాన్ని జయంతీలాల్‌ గడ పెన్ స్టూడియోస్‌ సమర్పణలో హవీష్‌ ప్రొడక్షన్స్‌ - ఎ స్టూడియోస్‌ బ్యానర్స్ పై సత్యనారాయణ కోనేరు నిర్మించారు. ఇందులో యాక్షన్ కింగ్ అర్జున్ - ఉన్ని ముకుందన్ - అనసూయ - ముఖేష్ రుషి - వెన్నెల కిషోర్ - రావు రమేష్ - మురళీ శర్మ - నికితిన్ ధీర్ - ఠాకూర్ అనూప్ సింగ్ - సచిన్ ఖేడేకర్ కీలక పాత్రలు పోషిస్తున్నారు. ప్రపంచ వ్యాప్తంగా 2022 ఫిబ్రవరి 11న ఈ చిత్రాన్ని విడుదల చేయనున్నారు.