జూనియర్ గాలి.. సినిమా హీరో!

సినీ రంగానికి చెందిన వాళ్లే కాదు.. ఈ మధ్య రాజకీయ రంగానికి చెందిన ప్రముఖుల వారసులు సినీ అరంగేట్రం చేస్తున్నారు. ఆంధ్రప్రదేశ్ మంత్రి గంటా శ్రీనివాసరావు తనయుడు గంటా రవితేజ ‘జయదేవ్’ అనే సినిమాతో తెలుగు తెరకు పరిచయం కాబోతున్న సంగతి తెలిసిందే. ఇదే బాటలో కర్ణాటక రాజకీయాల్లో ఒకప్పుడు చక్రం తిప్పి.. ఆపై కేసుల్లో చిక్కుకుని బెయిల్ మీద బయటికి వచ్చిన అపర కుబేరుడు గాలి జనార్దనరెడ్డి కూడా తన కొడుకు కిరీటి రెడ్డిని సినీ హీరోగా పరిచయం చేయబోతున్నట్లు వార్తలొస్తున్నాయి. ఆ మధ్య గాలి కూతురి పెళ్లి చేసినపుడు కిరీటి బాగానే హైలైట్ అయ్యాడు. పెళ్లి ఆహ్వానం కోసం రూపొందించిన వీడియోలో కనిపించిన కిరీటి.. ఆపై పెళ్లి వేడుకలో డ్యాన్సులతో అదరగొట్టినట్లు అతిథులు చెప్పుకున్నారు.

ఆ సమయంలోనే కిరీటికి సినిమాలపై ఉన్న ఆసక్తి గురించి కొందరు సినీ ప్రముఖలతో చర్చించాడట గాలి. సినిమాల విషయంలో కిరీటి చాలా పట్టుదల ఉండటంతో గాలి కాదనలేకపోయాడట. సొంతంగా బేనర్ పెట్టి అతడిని హీరోగా పరిచయం చేయాలని నిర్ణయించుకున్నాడని.. ఇందుకోసం కొందరు తెలుగు దర్శకులతో సంప్రదింపులు కూడా జరుపుతున్నాడని.. టాలీవుడ్లోనే కిరీటిని హీరోగా పరిచయం చేయొచ్చని ఊహాగానాలు వినిపిస్తున్నాయి. అన్నీ కుదిరితే వచ్చే ఏడాది జనవరికి కిరీటి తొలి సినిమా సెట్స్ మీదికి వెళ్లొచ్చని అంటున్నారు. మరి కిరీటి తెరంగేట్రం జస్ట్ రూమరో.. లేక వాస్తవమో కొన్ని రోజుల్లో తేలిపోయే అవకాశముంది.

Like Us on Facebook : https://www.facebook.com/Tupakidotcom/