సేతుప‌తిగా గంటా పుత్రుడు

టీడీపీ సీనియ‌ర్ నేత‌ - ఏపీ మానవ‌వ‌న‌రుల అభివృద్ధి శాఖ మంత్రి గంటా శ్రీనివాస‌రావు కుమారుడు గంటా ర‌వితేజ వెండి తెరంగేట్రానికి ఎప్పుడో రంగం సిద్ధ‌మైపోయింది. అప్పుడెప్పుడో గుణ‌శేఖ‌ర్ చిత్రం రుద్ర‌మ‌దేవీకి సంబంధించి విశాఖ‌లో జ‌రిగిన‌ ఆడియో ఫంక్ష‌న్ సంద‌ర్భంగానే రవితేజ లైమ్ లైట్ లోకి వ‌చ్చారు. ఆ త‌ర్వాత పెళ్లి చేసుకున్న ర‌వితేజ‌... వెండి తెర ఎంట్రీని కొంత‌కాలం పాటు వాయిదా వేశారు. తాజాగా ర‌వితేజ సినీ తెరంగేట్రానికి అంతా సిద్ధ‌మైపోయింది. హిట్ చిత్రాల డైరెక్ట‌ర్‌ గా పేరున్న జ‌యంత్ సీ. ప‌రాన్జీ చేతుల్లో తెర‌కెక్కుతున్న చిత్రం ద్వారా ర‌వితేజ టాలీవుడ్‌ లో అడుగుపెడుతున్నాడ‌ట‌. ఈ విష‌యాన్ని జ‌యంతే స్వ‌యంగా వెల్ల‌డించారు.

అయితే ర‌వితేజ ఎంట్రీ ఇస్తున్న చిత్రం డైరెక్ట్ తెలుగు మూవీ కాద‌ట‌. త‌మిళంలో అక్క‌డి జ‌నాల‌ను బాగానే ఆక‌ట్టుకున్న సేతుప‌తి చిత్రం తెలుగు రీమేక్‌ తో ఆయ‌న తెర‌కు ప‌రిచయ‌మ‌వుతున్నారట‌. అస‌లు ర‌వితేజ ఎంట్రీపై జ‌యంత్ ఏమ‌న్నారంటే... ర‌వితేజ ఎంట్రీ కోసం సేతుప‌తి చిత్రాన్ని ఎంచుకున్నామ‌ని ఆయ‌న చెప్పారు. త‌మిళంలో హిట్ చిత్రంగానే టాక్ వ‌చ్చిన సేతుప‌తిని... ర‌వితేజ్ ఇమేజ్‌ కు అనుగుణంగా పూర్తిగా మార్చేశామ‌ని చెప్పారు. క‌థ‌లో మార్పు లేకున్నా... అదే క‌థాంశంతో స‌న్నివేశాల‌ను తిర‌గ‌రాశామ‌ని, మొత్తం అన్ని సీన్ల‌ను కూడా కొత్త రూపు ఇస్తున్న‌ట్లు చెప్పారు. ఇక చిత్రంలో ర‌వితేజ‌... సేతుప‌తిలో విజ‌య్ సేతుప‌తి పాత్ర‌లో క‌నిపిస్తార‌ట‌. ఇప్ప‌టికే త‌మిళ సేతుప‌తి చిత్రం రీమేక్ హ‌క్కుల కొనుగోలు పూర్తి అయ్యింద‌ని, త్వ‌ర‌లోనే సినిమాను సెట్స్‌పైకి తీసుకువ‌స్తున్న‌ట్లు ఆయ‌న పేర్కొన్నారు. అప్పుడెప్పుడో ఆరేళ్ల క్రితం ప‌వ‌ర్ స్టార్ ప‌వ‌న్ క‌ల్యాణ్‌ తో తీసిన తీన్మార్ చిత్ర‌మే జ‌యంత్‌ కు టాలీవుడ్‌ లో చివ‌రి చిత్రం. తాజాగా ర‌వితేజ‌ను తెర‌కు ప‌రిచ‌యం చేస్తూ జ‌యంత్ ఆరేళ్ల త‌ర్వాత తెలుగులో చిత్రాన్ని తీస్తున్నార‌న్న మాట‌.

Like Us on Facebook : https://www.facebook.com/Tupakidotcom/