టీజర్: 'గ్రేట్‌ శంకర్‌' గా వస్తున్న మెగాస్టార్..!

మలయాళ మెగాస్టార్ మమ్ముట్టి నటించిన యాక్షన్ ఎంటర్టైనర్ 'మాస్టర్ పీస్'. అజయ్‌ వాసుదేవ్‌ దర్శకత్వం వహించిన ఈ సినిమా 2017లో మలయాళంలో విడుదలై సూపర్ హిట్ అయింది. అయితే ఇప్పుడు ఈ చిత్రాన్ని ''గ్రేట్‌ శంకర్‌'' పేరుతో తెలుగులోకి అనువదిస్తున్నారు. ఈ నేపథ్యంలో తాజాగా శనివారం చిత్ర టీజర్ ను యువ హీరో ఆది సాయికుమార్ విడుదల చేశారు.

టీజర్ చూస్తుంటే ఈ సినిమాలో స్టూడెంట్స్ తో ఫ్రెండ్లీగా ఉండే ఓ కాలేజీ లెక్చరర్ గా మమ్ముట్టి నటిస్తున్నారని తెలుస్తోంది. కాలేజీలో జరిగిన ఒక ఇష్యూలో పోలీసులు కలుగజేసుకోవడంతో స్టూడెంట్స్ కు అండగా నిలబడినట్లు కనిపిస్తుంది. 'పోలీసులు అంబులెన్సులను క్యాంపస్‌ లోకి రానివ్వం.. అర్థమైందా' అంటూ పవర్ ఫుల్ డైలాగ్ తో అలరించిన మమ్ముట్టి.. యాక్షన్ సీన్స్ లో అదరగొట్టారు.

'క్రాక్' సినిమాతో తెలుగు ప్రేక్షకులను దగ్గరైన వరలక్ష్మి శరత్‌ కుమార్‌ ఈ చిత్రంలో పవర్‌ ఫుల్‌ పోలీస్‌ ఆఫీసర్ గా కనిపిస్తున్నారు. హీరోయిన్ పూనమ్ బజ్వా ఇంట్రెస్టింగ్ క్యారెక్టర్ ప్లే చేసింది. అలానే 'జనతా గ్యారేజ్' ఫేమ్ ఉన్ని ముకుందన్‌ కూడా ఇందులో కీలక పాత్ర పోషించారు. దీపక్ దేవ్ సంగీతం సమకూర్చగా.. వినోద్ ఇల్లంపల్లి సినిమాటోగ్రఫీ అందించారు. ఎల్ భార్గవ్ సమర్పణలో శ్రీ ఎల్వీఆర్ ప్రొడక్షన్స్ పై లగడపాటి శ్రీనివాస్ ఈ చిత్రాన్ని తెలుగు ప్రేక్షకులకు అందిస్తున్నారు. త్వరలో 'గ్రేట్‌ శంకర్‌' సినిమా విడుదల తేదీని ప్రకటించనున్నారు.