చరణ్-బోయపాటి సెంటిమెంటుతో కొడతారట.

తెలుగులో మాస్ డైరెక్టర్లు చాలామందికి కాలం చెల్లిపోయింది. ఐతే బోయపాటి శ్రీను మాత్రం ఇంకా ఆ తరహా సినిమాలతో తన హవాను కొనసాగిస్తున్నాడు. అల్లు అర్జున్ కు ‘సరైనోడు’ లాంటి బ్లాక్ బస్టర్ ఇచ్చాక బోయపాటిపై అంచనాలు పెరిగాయి. ముందే ఉన్న కమిట్మెంట్ వల్ల బెల్లంకొండ శ్రీనివాస్ తో ‘జయ జానకి నాయక’ తీసిన బోయపాటి.. తిరిగి టాప్ స్టార్ ను డైరెక్ట్ చేస్తున్నాడు. ‘రంగస్థలం’తో మెగా విజయాన్నందుకున్న రామ్ చరణ్ హీరోగా బోయపాటి కొత్త సినిమాను తెరకెక్కిస్తున్న సంగతి తెలిసిందే. ఇద్దరూ మాస్ లో తిరుగులేని ఫాలోయింగ్ ఉన్న వాళ్లే కావడంతో ఇది ఆ వర్గం ప్రేక్షకుల్ని ఉర్రూతలూగించేలా ఉంటుందని భావిస్తున్నారు. ఐతే కేవలం మాస్ మంత్రాన్ని పఠిస్తే అన్ని వర్గాల ప్రేక్షకుల్నీ మెప్పించడం కష్టమని.. అందుకే ఇందులో మిగతా అంశాలకూ లోటు లేకండా చూస్తున్నారని సమాచారం.

చరణ్-బోయపాటి సినిమాలో సెంటిమెంటుకి.. ఫ్యామిలీ ఎంటర్టైన్మెంట్ కి కూడా ఢోకా ఉండదట. ఈ చిత్రంలో తొలి 15 నిమిషాలు చరణ్ చిన్న పిల్లాడిగా ఉన్న ఎపిసోడ్ వస్తుందట. అది హార్ట్ టచింగ్ గా ఉంటుందని.. హృదయాల్ని మెలిపెడుతుందని అంటున్నారు. ఈ సన్నివేశాల్ని బోయపాటి చాలా బాగా తీర్చిదిద్దాడని.. సినిమాకు ఇవి బలమైన పునాది వేస్తాయని చిత్ర యూనిట్ వర్గాలు చెబుతున్నాయి. దీంతో పాటు కుటుంబ ప్రేక్షకుల్ని మెప్పించే వినోదాత్మక సన్నివేశాలు కూడా సినిమాలో ఉంటాయట. ఈ చిత్ర షూటింగ్ 70 శాతానికి పైగా పూర్తయినట్లు సమాచారం. ఇంకో రెండు నెలల్లో టాకీ పార్ట్ పూర్తవుతుంది. డీవీవీ దానయ్య నిర్మాణంలో తెరకెక్కుతున్న ఈ చిత్రంలో ‘భరత్ అనే నేను’ హీరోయిన్ కియారా అద్వానీ రామ్ చరణ్ కు జోడీగా నటిస్తోంది. వచ్చే ఏడాది సంక్రాంతి కానుకగా ఈ చిత్రాన్ని రిలీజ్ చేయనున్నారు.