హీరోగా మారిన కొరియోగ్రాఫర్ ఎంత‌వ‌రకు ముందుకు వెళ్తాడో..!

ఇండస్ట్రీలో కొరియోగ్రాఫర్లుగా సక్సెస్ అయిన వారు.. దర్శకులుగా హీరోలుగా మారడం ఎప్పటినుంచో మనం చూస్తున్నాం. ఇండియన్ మైఖేల్ జాక్సన్ గా పేరు తెచ్చుకున్న డ్యాన్స్ మాస్టర్ ప్రభుదేవా.. హీరోగా మారి సక్సెస్ అయ్యాడు. ఈ క్రమంలో డైరెక్టర్ అవతారమెత్తిన ప్రభుదేవా.. ప్రస్తుతం ఓవైపు హీరోగా నటిస్తూనే మరోవైపు దర్శకత్వం చేస్తున్నారు. కొరియోగ్రాఫర్ రాఘవ లారెన్స్ కూడా ఇదే పంధాని కొన‌సాగించాడు. ప్రస్తుతం హీరోగా దర్శకుడిగా సత్తా చాటుతున్న లారెన్స్.. త‌న సినీ ప్ర‌స్థానాన్ని డాన్స్ మాస్ట‌ర్ గానే మొద‌లుపెట్టారు. ఇదే క్రమంలో అమ్మ రాజశేఖర్ కూడా నటుడిగా దర్శకుడిగా నిరూపించుకోవాలని ప్రయత్నించాడు. కాకపోతే ప్రభుదేవా - లారెన్స్ మాదిరిగా హీరోగా తనదైన ముద్ర వేయలేకపోయారు. ఈ క్రమంలో కొరియోగ్రాఫర్ జానీ మాస్ట‌ర్ కూడా హీరోగా ఎంట్రీ ఇస్తున్నాడు.

టాలీవుడ్‌ స్టార్ హీరోలందరికి డ్యాన్స్ కంపోజ్ చేసిన జానీ మాస్టర్.. స్టైలిష్‌ స్టెప్పులతో తనకంటూ ప్రత్యేకమైన గుర్తింపు తెచ్చుకున్నారు. తెలుగు తమిళ కన్నడ భాషల్లో తన డ్యాన్సులతో అలరించిన జానీ.. బాలీవుడ్ కూడా అడుగుపెట్టాడు. గతేడాది 'బుట్ట‌బొమ్మ' సాంగ్ తో వ‌ర‌ల్డ్ మొత్తం ట్రెండ్ అయిన జానీ మాస్టర్.. హీరోగా ఇండ‌స్ట్రీలోకి కొత్త అడుగులు వేస్తున్నాడు. డ్యాన్స్ మాస్టర్ గా కొనసాగుతూనే హీరోగా రెండు సినిమాలు ప్రారంభించాడు.

'#J1' వర్కింగ్ టైటిల్ తో ఇప్పటికే ఓ సినిమా స్టార్ట్ చేసి ఫస్ట్ లుక్ రిలీజ్ చేశారు. ఇందులో దిగంగన సూర్యవంశీ హీరోయిన్ గా నటిస్తోంది. నిన్న జానీ మాస్టర్ బర్త్ డే సందర్భంగా కథానాయకుడుగా 'దక్షిణ' అనే రెండో సినిమాని ప్రకటించారు. 'మంత్ర' 'మంగళ' వంటి విభిన్నమైన చిత్రాలతో గుర్తింపు తెచ్చుకున్న దర్శకుడు ఓషో తులసీరామ్ ఈ సూపర్ నేచురల్ థ్రిల్లర్ ని తెరకెక్కిస్తున్నారు. ప్రభుదేవా - లారెన్స్ బాటలో హీరోగా ఎంట్రీ ఇస్తున్న కొరియోగ్రాఫ‌ర్ జానీ.. ఎంత‌వ‌రకు ముందుకు వెళ్తాడో చూడాలి.