హైద‌రాబాద్ రెండో ఇల్లు.. బిస్కెట్ వేసిందే!

ముంబై బ్యూటీస్ ఎవ‌రైనా చెప్పే కామ‌న్ డైలాగ్ ఒక‌టి ఉంటుంది. అదే హైద‌రాబాద్ రెండో ఇల్లు లాంటిది. ఇక్క‌డ‌ స్పైసీ ఫుడ్ అంటే ఇష్టం! అంటూ కామ‌న్ గా కాంప్లిమెంట్ ఇచ్చేస్తుంటారు. అందుకు సాహో బ్యూటీ శ్ర‌ద్ధా క‌పూర్ కూడా అతీతం కాదు. నిన్న‌ తెలుగు మీడియా ముందుకు వ‌చ్చిన‌ప్పుడు హైద‌రాబాద్ రెండో ఇల్లుగా మారింద‌ని శ్ర‌ద్ధా తెలిపింది. అంత గొప్ప‌గా యు.వి.క్రియేష‌న్స్ ట్రీట్ చేసింద‌ని కితాబివ్వ‌డం విశేషం.

శ్రద్ధా కపూర్‌ మాట్లాడుతూ .. ``రెండేళ్లుగా ఇక్కడికి వచ్చి వెళుతున్నా. యు.వి.క్రియేషన్స్ బృందం ఎంతో ప్రేమగా చూసుకున్నారు. ఈ సినిమాతో ఇంత మంచి నిర్మాత‌లు పరిచయం కావడం ఆనందంగా ఉంది. ఇంత‌కు మించిన‌ బెస్ట్ డెబ్యూ ఉండ‌ద‌నే అనుకుంటున్నాను. ఇండియన్‌ బిగ్గెస్ట్‌ యాక్షన్‌ థ్రిల్లర్ సాహో ట్రైలర్‌ చూశాక ఎగిరి గంతేయ‌కుండా.. చప్పట్లు కొట్టకుండా నన్ను నేను కంట్రోల్‌ చేసుకోలేక‌పోయాను`` అంటూ ఎగ్జ‌యిట్ అయ్యింది. యు.వి.క్రియేష‌న్స్ ట్రీట్ మెంట్ వ‌ల్ల త‌న సొంత ఇంట్లో ఉన్న భావ‌న క‌లిగింద‌ని శ్ర‌ద్ధా తెలిపింది.

తాను యాక్ష‌న్ రోల్ చేస్తోంది కాబ‌ట్టి భారీ గ‌న్స్ చేతికి ఇచ్చారు. వాటిని ప‌ట్టుకుంటే చేతులు ఒణికాయ‌ని శ్ర‌ద్ధా తెలిపారు. ఆరంభం అలా ఉన్నా.. క్ర‌మంగా అల‌వాటు ప‌డ్డాన‌ని శ్ర‌ద్ధా చెప్పింది. ఈ మూవీ కోసం ప్ర‌పంచ‌వ్యాప్తంగా ఉన్న యాక్ష‌న్ కొరియోగ్రాఫ‌ర్స్ ని తీసుకొచ్చారు. చాలా హార్డ్ వ‌ర్క్ చేశాను అని వెల్ల‌డించింది. అలాగే త‌న‌ పాత్ర కోసం పూర్తిగా ద‌ర్శ‌కుడిపైనా ఆధార‌ప‌డ్డాన‌ని.. త‌న‌ను వేల‌కొద్దీ ప్ర‌శ్న‌లు అడిగాన‌ని తెలిపింది. అడిగిన ప్ర‌తి దీనికీ సుజీత్ ఓపిగ్గా ఆన్స‌ర్ చేశార‌ట‌. ఆషికీ 2 లాంటి ప్రేమ‌క‌థా చిత్రంలో అద్భుతంగా నటించిన శ్రద్ధాకపూర్ యాక్షన్ రోల్ చేస్తే ఎలా ఉంటుందో చూడటానికి బాలీవుడ్ ప్రేక్షకులు ఆసక్తిగా ఎదురుచూస్తున్నారు. ఈ నేప‌థ్యంలో శ్ర‌ద్ధా అటు బాలీవుడ్ మీడియా .. ఇటు తెలుగు మీడియాతో ర‌క‌ర‌కాల సంగ‌తుల్ని పంచుకుంది.