రానా రికమండ్ చేశాడా?

పవర్ స్టార్ పవన్ కల్యాణ్ సరసన `అత్తారింటికి దారేది` చిత్రంలో నటించింది ప్రణీత సుభాష్. ఈ చేపకళ్ల సోయగం అందానికి.. క్లాసిక్ పెర్ఫామెన్స్ కి ప్రశంసలు దక్కాయి. పవన్ తన కెరీర్ కి బిగ్ బ్రేక్ ఇచ్చినా ఎందుకనో దానిని నిలబెట్టుకోవడంలో మాత్రం ప్రణీత తడబడింది. వరుసగా ఫ్లాపులు ఎదురవ్వడంతో తిరిగి కన్నడ పరిశ్రమకు బౌన్స్ బ్యాక్ అయిపోయింది. ప్రణీత ప్రస్తుతం మాతృ పరిశ్రమలో బిజీగా ఉంది. టాలీవుడ్ లో మాత్రం ఛాన్సుల్లేవ్. అప్పుడప్పుడు హైదరాబాద్ లో పలు రిబ్బన్ కటింగ్ ఈవెంట్ల తో మాత్రం టచ్ లో ఉంటోంది.

తాజాగా ఈ అమ్మడు బాలీవుడ్ లో ప్రవేశిస్తోంది. అది కూడా భారీ తారాగణంతో తెరకెక్కనున్న మల్టీస్టారర్ లో ప్రణీత అవకాశం దక్కించుకుంది. అజయ్ దేవగన్, సంజయ్ దత్, సోనాక్షి సిన్హా, పరిణీతి, అమీ విర్క్ లాంటి టాప్ స్టార్లు నటిస్తున్న ఈ సినిమాకి  `భుజ్:  ది ప్రైడ్ ఆఫ్ ఇండియా` అనే టైటిల్ ని ప్రకటించారు. అభిషేక్ దూధయా ఈ చిత్రానికి దర్శకత్వం వహిస్తున్నారు. 2020 ఆగస్టు 14న రిలీజ్ చేయనున్నామని చిత్రయూనిట్ తెలిపింది. ఆసక్తికరంగా ఈ భారీ మల్టీస్టారర్ లో టాలీవుడ్ యంగ్ హీరో రానా ఓ కీలక పాత్ర పోషించనున్నాడు.

వరుసగా హిందీలో భారీ మల్టీస్టారర్లకు సంతకాలు చేస్తున్న రానా ..   `హౌస్ ఫుల్ 4` తర్వాత అజయ్ దేవగణ్ తో కలిసి నటించేందుకు రెడీ అవుతున్నాడు. ఇదే చిత్రంలో అందాల ప్రణీత అవకాశం దక్కించుకోవడంపైనా ఆసక్తికర చర్చ సాగుతోంది. అక్షయ్, అజయ్ దేవగణ్ లాంటి టాప్ స్టార్లతో సత్సంబంధాలున్న రానా ఈ సినిమా కోసం ప్రణీతను రికమండ్ చేశాడా? అంటూ యూత్ ఆసక్తిగా మాట్లాడుకుంటున్నారు. మొత్తానికి ఇలాంటి భారీ క్రేజీ సినిమాతో బాలీవుడ్ కి పరిచయం అవుతోంది కాబట్టి.. కనీసం అక్కడైనా ప్రణీతకు లక్ కలిసొస్తుందేమో చూడాలి.