పండుగ వేళ.. రీల్ గీతకు రియల్ ఐటీ అధికారుల షాక్

ఏ పండుగ అయినా ఒకట్రెండు రోజులు మాత్రమే. కానీ.. సంక్రాంతి పండుగ మాత్రం ఏకంగా మూడు రోజులు ధూంధాంగా చేస్తుంటారు. పిల్లల స్కూళ్లకు సెలువులు ఇచ్చేయటంతో ఈ పండుగ వేళ సంబరాలు అంబరాన్ని అంటుతుంటాయి. చుట్టాలు.. పిండివంటలు.. సినిమాలు.. స్నేహితులు.. ఇలా భారీ బఫెట్ మాదిరి సంక్రాంతి పండుగ వేళ ఉంటుంది. మామూలోళ్ల సంగతే ఇలా ఉంటే.. పండుగ వేళ సరిలేరు నీకెవ్వరు అంటూ బ్లాక్ బస్టర్ మూవీ సక్సెస్ ను ఎంజాయ్ చేస్తున్న రష్మికకు భారీ షాక్ తగిలింది.

కర్ణాటకలోని ఆమె నివాసంలో ఐటీ అధికారులు సోదాలు నిర్వహించటం సంచలనంగా మారింది. వరుస హిట్లతో.. లక్కీ మస్కట్ గా చెప్పుకునే ఈ రీల్ గీతకు పండుగ షాక్ మామూలుగా లేదంటున్నారు.కొడుగు జిల్లా విరాజ్ పేటలోని ఆమె నివాసంలో ఐటీ అధికారులు పెద్ద ఎత్తున తనిఖీలు చేస్తున్నట్లు చెబుతున్నారు. ఈ ఉదయం (గురువారం) నుంచి మొదలైన సోదాలు ఇంకా కొనసాగుతున్నట్లుగా చెబుతున్నారు. పన్ను సరిగా కట్టటం లేదన్న ఫిర్యాదుతో సోదాలు జరుపుతున్నారని తెలుస్తోంది. ఐటీ అధికారులు తన ఇంట్లో సోదాలు చేస్తున్న విషయం తెలిసిన ఆమె.. హైదరాబాద్ నుంచి చెన్నైకి విమానంలో బయలుదేరినట్లుగా తెలుస్తోంది.

భారీ సక్సెస్ తో దూసుకెళుతున్న సరిలేరునీకెవ్వరు విజయాన్ని ఎంజాయ్ చేస్తున్న రష్మిక ఉత్సాహం మీద నీళ్లు పోసేలా సోదాలు ఉన్నట్లుగా చెప్పక తప్పదు. మరో నెలలో ఆమె నటించిన భీష్మ మూవీ విడుదల కానుంది. వరుస సినిమాలతో బిజీగా ఉన్న ఆమెకు ఐటీ సోదాలు ఇబ్బందిని కలిగిస్తాయా? అన్న ప్రశ్న వెంటాడుతోంది. అయితే.. రష్మిక మేనేజర్ మాత్రం ఇలాంటివన్నీ రోటీన్ అని వ్యాఖ్యానించటం ఆసక్తికరంగా మారింది.  మరేం జరుగుతుందో చూడాలి.