ఎన్టీఆర్-బుచ్చిబాబు కాంబోలో సినిమా లేనట్లేనా..?

యంగ్ టైగర్ ఎన్టీఆర్ - డైరెక్టర్ బుచ్చిబాబు కాంబినేషన్ లో ఓ సినిమా రూపొందనుందని ఈ మధ్య వార్తలు వస్తున్న విషయం తెలిసిందే. 'ఉప్పెన' సినిమాతో సక్సెస్ అందుకున్న బుచ్చిబాబు ఇప్పటికే తారక్ కు ఓ కథ వినిపించారని.. లైన్ న‌చ్చేయ‌డంతో హీరో సైడ్ నుంచి గ్రీన్ సిగ్నల్ కూడా వచ్చిందని ఫిలిం సర్కిల్స్ లో టాక్ నడిచింది. ప్రస్తుతం ఫైనల్ స్క్రిప్టును రెడీ చేసే పనిలో బిజీగా ఉన్నారని.. మైత్రీ మూవీ మేక‌ర్స్ బ్యాన‌ర్ లో ఈ సినిమా ఉంటుందని ప్రచారం జరిగింది. అయితే తాజాగా ఓ ఇంటర్వ్యూలో 'RRR' తరువాత చేయబోయే సినిమాలపై క్లారిటీ ఇచ్చిన ఎన్టీఆర్.. బుచ్చిబాబుతో చేయ‌బోయే సినిమా గురించి ఎలాంటి ప్రస్తావన తెలేదు.

'ఆర్.ఆర్.ఆర్' తరువాతే కొరటాల శివ సినిమాను స్టార్ట్ చేయబోతున్నట్లు తారక్ వెల్లడించారు. దీని తర్వాత 'కేజీఎఫ్' దర్శకుడు ప్రశాంత్ నీల్ దర్శకత్వంలో ఓ సినిమా ఉంటుందని స్పష్టం చేశారు. దీంతో తారక్ లైనప్ లో బుచ్చిబాబు సినిమా ఉన్నట్లా లేనట్లా అనే డిస్కషన్ మొదలైంది. 'RRR' కంప్లీట్ చేసి కొర‌టాల శివ పాన్ ఇండియా సినిమా పూర్తి చేయడానికి ఎన్టీఆర్ కు ఏడాదికి పైగా సమయం పడుతుంది. ఆ త‌ర‌వాత ప్ర‌శాంత్ నీల్ సినిమాకి మరో ఏడాదికి పైగా టైం ఇవ్వాల్సి ఉంటుంది. ఇవన్నీ లెక్కలోకి వేసుకుంటే బుచ్చిబాబు నెంబర్ రావడానికి చాలా సమయం పట్టే ఛాన్సెస్ ఉన్నాయి. దీనికి తోడు షారూఖ్ ఖాన్ ప్రాజెక్ట్ కంప్లీట్ చేసిన తర్వాత కోలీవుడ్ స్టార్ డైరెక్టర్ అట్లీ లైన్ లోకి వచ్చే అవకాశం కూడా ఉంది. ఇదంతా చూస్తుంటే ఇప్పట్లో ఎన్టీఆర్ - బుచ్చిబాబు కాంబోలో సినిమా కష్టమే అనిపిస్తోంది.