కాజల్‌ కథ కూడా సమాప్తం!!

ఇప్పటివరకు స్టార్‌ హీరోయిన్‌గా హల్‌చల్‌ చేసిన కాజల్‌ అగర్వాల్‌.. ఆ మధ్యన బాద్షా సినిమా చేసిన తరువాత అసలు టాలీవుడ్‌లో సినిమాలు ఒప్పుకోవడమే మానేసింది. ఏకంగా రెండు కోట్లు రెమ్యూనరేషన్‌ కావాలంటూ నానా హంగామా చేసింది. అయితే చివరకు చరణ్‌ సరసన గోవిందుడు అందరివాడేలే, ఆ తరువాత ఎన్టీఆర్‌తో టెంపర్‌ తప్పించి మరో సినిమాలేవీ రాలేదు. ఇవన్నీ ఇప్పుడు పూర్తయిపోవడంతో, టాలీవుడ్‌లో కాజల్‌ ఖాళీ అనే చెప్పాలి.

ఇక తమిళంలో కూడా అమ్మడు పెద్దగా సినిమాలు ఒప్పుకోలేదు. కేవలం ధనుష్‌ సరసన 'మారి' అనే సినిమా తప్పించి మరో సినిమా సైన్‌ చెయ్యలేదు సుందరీమణి. ఈరోజుతో ఆ సినిమా షూటింగ్‌ కూడా పూర్తయ్యింది. కాజల్‌కు గుడ్‌బాయ్‌ చెప్పేశారు. ఈ లెక్కన చూస్తే సౌత్‌లో కాజల్‌ చేస్తున్న సినిమాలన్నింటికీ కథ సమాప్తం అయిపోయింది. బాలీవుడ్‌లో అంటారా.. అక్కడ అమ్మడికి ఒక్క సినిమా కూడా లేదు మరి. తదుపరి అమ్మడు ఏం చేయబోతున్నట్లు? సినిమాలు చేస్తుందా లేకపోతే కామ్‌గా పెళ్ళిచేసుకొని సెటిల్‌ అయిపోతుందా.. చూద్దాం. వెయిట్‌ అండ్‌ సి.