రాజమౌళిపై కరణ్ మళ్లీ..

మా తరంలో ఇతనే అత్యుత్తమ దర్శకుడు.. అంటూ రాజమౌళికి కొన్ని రోజుల కిందట గొప్ప కితాబే ఇచ్చాడు బాలీవుడ్ స్టార్ డైరెక్టర్ కమ్ ప్రొడ్యూసర్ కరణ్ జోహార్. తాజాగా ఆయన మరోసారి బేషజం లేకుండా రాజమౌళిని పొగిడేశాడు. ఈ దశాబ్దం రాజమౌళిదే అని.. మున్ముందు మరిన్ని సంవత్సరాలు రాజమౌళి హవా సాగబోతోందని.. రాజమౌళికి సెల్యూట్ చేస్తున్నానని.. అతడిపై ఉన్న గౌరవం ఎప్పటికీ నిలిచిపోతుందని.. ఇండియాలో కొత్త సూపర్ హీరో రాజమౌళే అని.. ఇలా పతాక స్థాయిలో మన జక్కన్నను పొగిడేశాడు కరణ్ జోహార్. స్వయంగా బాలీవుడ్ స్టార్ డైరెక్టర్లలో ఒకడై ఉండి.. మన రాజమౌళిని కరణ్ ఇలా పొగడటం గొప్ప విషయమే.

దీన్ని బట్టి ‘బాహుబలి’తో కరణ్ ఎంతగా ఇంప్రెస్ అయ్యాడో అర్థం చేసుకోవచ్చు. ఈ సినిమా ద్వారా కరణ్ భారీ లాభాలు జేబులో వేసుకుంటుండటం కూడా ఆయనిలా పొగడ్డానికి కారణం కావచ్చు. ఐతే కరణ్ మరీ ఇంతలా రాజమౌళిని పొగడటం బాలీవుడ్ జనాలకు నచ్చట్లేదు. ఇప్పటికే ‘బాహుబలి-2’ సాగిస్తున్న వసూళ్ల ప్రభంజనం చూసి బాలీవుడ్ కుదేలైపోతోంది. తెలుగు నుంచి డబ్ అయిన ఓ సినిమా ఈ స్థాయిలో వసూళ్లు రాబట్టడం ఏంటో వాళ్లకు అర్థం కావడం లేదు. ఈ సినిమాను ఉదాహరణగా చూపించి.. అందరూ బాలీవుడ్ సినిమాల్ని.. ఇక్కడి ఫిలిం మేకర్స్ ను తక్కువ చేసి మాట్లాడుతున్నారు. అందుకే చాలామంది బాలీవుడ్ ప్రముఖులు ‘బాహుబలి-2’ గురించి స్పందించకుండా సైలెంటుగా ఉన్నారు. ఇలాంటి తరుణంలో కరణ్ ఇలా రాజమౌళిని పొగడ్డం బాలీవుడ్ జనాలకు కాక తెప్పించేదే.

Like Us on Facebook : https://www.facebook.com/Tupakidotcom/