దుబాయ్ ‌లో కింగ్ ఖాన్ ధూమ్మ‌చాలే ధూమ్..

గ‌త నాలుగేళ్లుగా కింగ్ ఖాన్ వ‌రుస ప‌రాజ‌యాల‌తో ఉక్కిరిబిక్కిరి అవుతున్న‌ సంగ‌తి తెలిసిందే. ఖాన్ తిరిగి పూర్వ వైభ‌వాన్ని తేవాలంటే ఒక అద్భుతం చేయాల్సిన త‌రుణ‌మిది. ఇలాంటి స‌మ‌యంలో ఆయ‌న ఎంతో ఆచితూచి ఓ సినిమాని ఎంపిక చేసుకున్నారు. అదే ప‌ఠాన్.గ్యాప్ తర్వాత షారుఖ్ ఖాన్ ఘ‌న‌మైన కంబ్యాక్ కోసం తీవ్రంగా శ్ర‌మిస్తున్నారు. ఇటీవ‌ల ముంబైలో కీల‌క షెడ్యూల్ ని చిత్రీకరించారు. ఈ చిత్రానికి సిద్ధార్థ్ ఆనంద్ దర్శకత్వం వహిస్తున్నారు. యష్ రాజ్ సంస్థ‌ ఈ చిత్రాన్ని నిర్మిస్తోంది.

ఈ చిత్రంలో జాన్ అబ్రహాం విల‌న్ పాత్ర‌ను పోషిస్తున్నారు. ప్ర‌స్తుతం SRK వ‌ర్సెస్ జాన్ ఎపిసోడ్స్ ని దుబాయ్ లో చిత్రీకరిస్తున్నారు. ఈ షూటింగ్ కోసం రద్దీగా ఉండే రోడ్లు భవనాలను యష్ రాజ్ బ్యాన‌ర్ చాలా కాలం క్రిత‌మే లాక్ చేసింది‌. ఇప్పుడు కొన్ని క్రేజీ చేజ్ దృశ్యాలు .. పోరాట స‌న్నివేశాల్ని అక్కడ చిత్రీకరిస్తున్నారు.

తాజాగా పఠాన్ దుబాయ్ షూట్ నుంచి ఆన్ లొకేష‌న్ దృశ్యాలు  ఆన్ లైన్ లో లీక్ అవుతున్నాయి.  అభిమానులు ఎంతో ఆసక్తిగా ఎదురుచూస్తున్న స్పై-థ్రిల్లర్ నుంచి కింగ్ ఖాన్ న‌టిస్తున్న దృశ్యాలు తాజాగా లీకైపోవ‌డం షాక్ కి గురి చేస్తోంది. షారూక్ భారీ యాక్షన్ సన్నివేశాల చిత్రీక‌ర‌ణ‌లో పాల్గొంటున్నార‌ని ఈ వీడియోలు చూస్తే అర్థ‌మ‌వుతోంది. ఇక అత‌డి లుక్ కూడా చాలా వైవిధ్యంగా క‌నిపిస్తోంది.

ప్ర‌స్తుతం ఈ వీడియోలు ఇంటర్నెట్ లో వైరల్ అవుతున్నాయి. ఈ లీకులు అభిమానులలో ఉత్సాహాన్ని పెంచుతున్నా చిత్ర‌బృందం కొంత ఆందోళ‌న‌కు గురవుతోంద‌ని కూడా టాక్ వినిపిస్తోంది. ఇటీవల ఒక ఇంటర్వ్యూలో షారూఖ్ ఖాన్ సర‌స‌న ప‌ఠాన్ లో న‌టిస్తున్నాన‌ని దీపిక ప‌దుకొనే అధికారికంగా ధృవీకరించారు.