పవన్ తో సినిమాపై కోన క్లారిటీ!

టాలీవుడ్ లో విపరీతమైన ఫాలోయింగ్ ఉన్న స్టార్స్ లో పవర్ స్టార్ ఒకరు. తెరపై పవన్ కనిపిస్తే పిచ్చెక్కిపోయే ఫ్యాన్స్, ఆయన నటించే సినిమా కోసం చర్చల స్థాయి నుండీ విపరీతంగా ఫాలో అవుతూ, ఎదురుచూస్తే అభిమానులు కోకొల్లాలు. ఇక దర్శకులు - రచయితలు - టెక్నీషియన్స్ గురించి అయితే ప్రత్యేకంగా చెప్పేదేముంది... పవన్ తో ఒక సినిమా పడితే కెరీర్ గ్రాఫ్ ఎలా ఉంటుందో వారందరికీ తెలిసిందే. దీంతో ఆ విషయంలో చాలా మంది యువ దర్శకులు ఎక్కువగా పోటీలు పడుతుంటారు. ఇక కోన లాంటి స్టార్ రైటర్ పవన్ సినిమాకు మెగా మైక్ పడితే హైప్స్ ఎక్కడో ఉంటాయి. అయితే ఈ విషయాలపై తాజాగా స్పందించారు కోన వెంకట్.

ఇప్పటి వరకు రచయితగా సూపర్ డూపర్ హిట్ సినిమాలు రాసి తన సత్తా చాటుకున్న కోన వెంకట్... స్టార్ రైటర్ గా ఓ వెలుగు వెలిగారు. ఐతే ఇదే క్రమంలో త్వరలో దర్శకత్వంలోనూ అడుగు పెట్టి తన టాలెంటు నిరూపించుకోవాలని ఆశ పడుతున్నారన్న సంగతి తెలిసిందే. దీనిపై ఆయన ఓ స్టార్ హీరోకు కథ చెప్పి ఒప్పించారని, అతనెవరో కాదు... పవన్ కళ్యాణే అని అప్పట్లో వార్తలొచ్చాయి. అయితే ప్రస్తుతానికి పవన్ తో సినిమా ఇంకా ఓకే కాలేదని, మంచి కథతో వస్తే మాత్రం కచ్చితంగా సినిమా చేద్దామని పవన్ తనకు మాట ఇచ్చారని చెబుతున్నారు కోన. అయితే దర్శకుడిగా ఎప్పుడో మారాల్సి ఉన్నా, కొందరు దర్శక మిత్రుల కోరిక మేర ఇంకా రచయితగా కొనసాగుతున్నానని తెలిపారు. ఈ లెక్కన చూసుకుంటే కాస్త గ్యాప్ దొరికితే, మంచి కథ రాసి పవన్ ను ఒప్పించి, కోన వెంకట్ స్టార్ దర్శకుడిగా మారే రోజులు చాలా దగ్గర్లోనే ఉన్నాయని అనుకోవచ్చేమో!

Like Us on Facebook : https://www.facebook.com/Tupakidotcom/