బాలీవుడ్ లో మళ్లీ కోట కడుతున్నాడు

కోట శ్రీనివాసరావు నటనకు టాలీవుడ్ లో బోలెడంత గుర్తింపు ఉంది. ఏ పాత్రనైనా తనకే ప్రత్యేకమైన నటనతో ఆకట్టుకోవడం కోట స్పెషాలిటీ. చిన్నపాటి రోల్స్ నుంచి మెయిన్ విలన్ వరకూ అన్ని రకాల కేరక్టర్లను పోషించడంలో దిట్ట కోట. ఈయన ఇప్పుడు ఓ బాలీవుడ్ చిత్రంలో కీలక పాత్ర చేస్తున్నారు. గతంలోనూ దర్శకుడు రామ్ గోపాల్ వర్మ తీసిన కొన్ని చిత్రాల్లో నటించినా.. ఇప్పుడు చాలా కాలం తర్వాత ఓ మంచి రోల్ తో బాలీవుడ్ లో అడుగుపెడతున్నారు కోట.

ప్రభాస్ - గోపీచంద్ లు కలిసి నటించిన వర్షం చిత్రాన్ని బాలీవుడ్ లో రీమేక్ చేస్తున్నారు. బాఘీ: రెబెల్స్ ఇన్ లవ్ టైటిల్ పై ఈ మూవీ తెరకెక్కుతోంది. టైగర్ ష్రాఫ్ ఈ బాఘీలో హీరోగా నటిస్తుండగా.. శ్రద్ధా కపూర్ హీరోయిన్ గా నటిస్తోంది. ఈ సినిమాను సబ్బీర్ ఖాన్ దర్శకత్వం వహిస్తుండగా.. ఫిలిం ప్రొడ్యూసర్ పాత్రను కోట శ్రీనివాసరావు చేస్తున్నారు. 'ఇది ఓ విభిన్న దక్షిణాది నిర్మాత పాత్ర. కోట డైలాగ్ డెలివరీ - యాక్టింగ్ కి యూనిట్ అంతా చప్పట్లు కొట్టి మరీ అభినందిస్తున్నారు' అంటున్నాయి యూనిట్ వర్గాలు.

తెలుగులో సూపర్ హిట్ అయిన ఈ బాలీవుడ్ బాఘీపై చాలానే అంచనాలు ఉన్నాయి. లీడ్ పెయిర్ కూడా చాలా బాగుందనే టాక్ వస్తోంది. ఈ సినిమా తర్వాత బాలీవుడ్ లో కోటకు వరుస ఆఫర్స్ వస్తాయనే అంచనాలు వినిపిస్తున్నాయి.