‘శాతకర్ణి’లో వాటిని దాచేసిన క్రిష్

మొన్న దసరా పండక్కి విడుదలైన ‘గౌతమీపుత్ర శాతకర్ణి’ నందమూరి అభిమానుల్నే కాక.. సామాన్య ప్రేక్షకుల్ని కూడా బాగానే ఆకట్టుకుంది. అందులోని విజువల్స్ టాప్ క్లాస్ అనిపించాయి. ఐతే టీజర్ గమనిస్తే.. అందులో దాదాపుగా క్లోజప్ షాట్సే కనిపిస్తాయి. లాంగ్ షాట్ ఒక్కటీ లేదు. భారీ తనాన్ని చూపించే సన్నివేశాలేమీ కనిపించలేదు.

బాలయ్య యుద్ధం చేస్తున్న దృశ్యాల్లోంచి క్లోజప్ షాట్స్ తీసి.. వాటికి ఒక షార్ట్ డైలాగ్ జోడించి టీజర్ వదిలాడు క్రిష్. ఈ సినిమా కోసం మొరాకోలో.. జార్జియాలో భారీ హంగామా మధ్య షూటింగ్ చేయడం గుర్తుండే ఉంటుంది. వందల సంఖ్యలో గుర్రాలు.. పదుల సంఖ్యలో ఏనుగులు.. రథాలు.. వేలమంది జూనియర్ ఆర్టిస్టుల మధ్య షూటింగ్ చేస్తున్నట్లు ప్రెస్ నోట్లు కూడా ఇచ్చారు. కానీ ఆ భారీ తనం ఏదీ టీజర్లో చూపించలేదు. ఐతే క్రిష్ ఉద్దేశపూర్వకంగా వీటన్నింటినీ దాచేసినట్లు సమాచారం.

ఇప్పుడే వాటిని బయటపెట్టేస్తే థ్రిల్ పోతుందని.. విడుదలకు ముందు ట్రైలర్ కోసం ఆ షాట్లన్నింటినీ దాచుకున్నాడట క్రిష్. ఇప్పుడే అవి చూపించేస్తే హైప్ మరీ ఎక్కువైపోయి ఇబ్బంది పడతామని.. అలాగే థ్రిల్ పోతుందని క్రిష్ ఈ నిర్ణయం తీసుకున్నాడట. ట్రైలర్లో కూడా మరీ ఎక్కువ విశేషాలేమీ చూపించకూడదని.. నేరుగా వెండితెర మీదే ప్రేక్షకులకు అద్భుతమైన అనుభూతిని పంచాలని క్రిష్ భావిస్తున్నట్లు యూనిట్ సభ్యులు చెబుతున్నారు.

Like Us on Facebook : https://www.facebook.com/Tupakidotcom/