ఇండియన్‌ 2 నుండి కీలక అప్‌ డేట్‌ వచ్చింది

సౌత్‌ ఇండియా దిగ్గజ దర్శకుడు శంకర్‌.. యూనివర్శిల్‌ స్టార్‌ కమల్‌ హాసన్‌ ల కాంబోలో చాలా ఏళ్ల క్రితం వచ్చిన భారతీయుడు చిత్రానికి సీక్వెల్‌ ప్రారంభం అయిన విషయం తెల్సిందే. రెండేళ్ల క్రితమే ఈ సీక్వెల్‌ కు సంబంధించిన పనులు ఆరంభం అయ్యాయి. గత ఏడాది షూటింగ్‌ కూడా చకచక జరిగింది. సినిమా ప్రారంభించినప్పటి నుండి ఏదో ఒక వార్త వస్తూనే ఉంది. బడ్జెట్‌ ఎక్కువ అవుతున్న కారణంగా లైకా ప్రొడక్షన్స్‌ ఈ సినిమాను ఆపేసిందని కొన్ని రోజులు ప్రచారం జరిగింది.

ఆ వార్తలను కొట్టి పారేస్తూ మళ్లీ షూటింగ్‌ ప్రారంభం అయ్యింది. షూటింగ్‌ శరవేగంగా జరుగుతున్న సమయంలో క్రేన్‌ యాక్సిడెంట్‌ అవ్వడంతో మళ్లీ షూటింగ్‌ ఆగిపోయింది.  అప్పటి నుండి కూడా మళ్లీ ఇండియన్‌ 2 మొదలయ్యేది అనుమానమే అంటూ తమిళ మరియు తెలుగు మీడియాల్లో వార్తలు వచ్చాయి. ఇండియన్‌ 2 మొదలు పెట్టినప్పటి నుండి ఏదో ఒక ఇబ్బంది తలెత్తుతున్న కారణంగా లైకా ప్రొడక్షన్స్‌ పూర్తిగా ప్రాజెక్ట్‌ ను పక్కకు పెట్టేసింది అంటూ మీడియాలో ప్రముఖంగా వార్తలు వస్తున్నాయి.

తాజాగా మీడియా కథనాలపై లైకా ప్రొడక్షన్స్‌ ప్రతినిధులు స్పందించారు. మీడియాలో వస్తున్న వార్తలన్నీ అవాస్తవం. సినిమా సగానికి పైగా పూర్తి అయ్యింది. కోట్లు ఖర్చు చేసి ఇప్పుడు మద్యలో ఎందుకు వదిలేస్తాం. సినిమాను ఖచ్చితంగా పూర్తి చేస్తాం. కొన్ని కారణాల వల్ల ఆలస్యం అయినా కూడా త్వరలోనే మళ్లీ షూటింగ్‌ ప్రారంభిస్తామని క్లారిటీ ఇచ్చారు. దీంతో ఇండియన్‌ 2 చిత్రం కోసం ఎదురు చూస్తున్న వారు ఊపిరి పీల్చుకున్నారు.