'మాస్ట్రో' నుంచి బ్యూటిఫుల్ 'వెన్నెల్లో ఆడపిల్ల' సాంగ్ ప్రోమో..!

యూత్ స్టార్ నితిన్ హీరోగా మేర్లపాక గాంధీ దర్శకత్వంలో తెరకెక్కుతున్న చిత్రం ''మాస్ట్రో''. బ్లాక్ కామెడీ క్రైమ్ థ్రిల్లర్ గా రూపొందుతున్న ఈ చిత్రంలో నితిన్ అంధుడిగా కనిపించనున్నారు. ఇప్పటికే విడుదలైన ప్రచార చిత్రాలు - ఫస్ట్ లుక్ పోస్టర్ - టీజర్‌ విశేష స్పందన తెచ్చుకున్నాయి. అలానే 'మాస్ట్రో మ్యూజిక్ ఫెస్ట్' లో భాగంగా వదిలిన 'బేబీ ఓ బేబీ' పాట కూడా అలరించింది. ఈ క్రమంలో తాజాగా 'వెన్నెల్లో ఆడపిల్ల' అనే మరో సాంగ్ ప్రోమో వీడియోని చిత్ర యూనిట్ విడుదల చేశారు.

'అనగనగగా అందమైన కథగా మొదలైన ఈ మనసే.. వెన్నెల్లో ఆడపిల్లే తనా.. ఈ చీకటై మిగిలానా' అంటూ సాగిన ఈ పాట వినసొంపుగా ఉంది. దీనికి మహతి స్వర సాగర్ శ్రావ్యమైన ట్యూన్ సమకూర్చగా..  స్వీకర్ అగస్తి ఆలపించారు. శ్రీజో - కృష్ణ చైతన్య ఈ పాటకు సాహిత్యం అందించారు. ఈ సాంగ్ లో నితిన్ మరియు నభా నటేష్ మధ్య కెమిస్ట్రీ బాగా వర్కవుట్ అయింది. 'వెన్నెల్లో ఆడపిల్ల' పూర్తి సాంగ్ ఆగస్టు 6న రిలీజ్ కానుంది.

''మాస్ట్రో'' చిత్రం హిందీలో బ్లాక్ బస్టర్ హిట్ అయిన 'అంధాదున్' చిత్రానికి అధికారిక తెలుగు రీమేక్. ఇందులో నితిన్ సరసన నభా నటేష్ హీరోయిన్ గా నటించగా.. మిల్కీ బ్యూటీ తమన్నా భాటియా కీలక పాత్రలో కనిపించనుంది. న‌రేష్‌ - జిషుసేన్ గుప్తా - శ్రీ‌ముఖి - అన‌న్య‌ - హ‌ర్ష‌వ‌ర్ధ‌న్ - ర‌చ్చ ర‌వి - మంగ్లీ - శ్రీ‌నివాస్ రెడ్డి ఇతర పాత్రల్లో నటించారు. జె యువ‌రాజ్ ఈ చిత్రానికి సినిమాటోగ్రఫీ అందించగా.. ఎస్.ఆర్ శేఖర్ ఎడిటింగ్ వర్క్ చేశారు. రాజ్ కుమార్ ఆకెళ్ల సమర్పణలో శ్రేష్ఠ మూవీస్ బ్యానర్ పై ఎన్.సుధాకర్ రెడ్డి - నికిత రెడ్డి ఈ చిత్రాన్ని నిర్మిస్తున్నారు. 'మేస్ట్రో' విడుదల తేదీని మేకర్స్ త్వరలోనే ప్రకటించనున్నారు.