అల్లరోడిని రికమండ్ చేసింది మహేషే

‘మహర్షి’ సినిమాతో అల్లరి నరేష్ కెరీర్లో కొత్త బాట పడుతున్నాడు. అతను తొలిసారిగా ఓ స్టార్ హీరో సినిమాలో ప్రత్యేక పాత్ర పోషిస్తున్నాడు. తాజాగా ఒక ఇంటర్వ్యూలో ఆ సినిమా గురించి అల్లరోడు ఆసక్తికర విషయాలు పంచుకున్నాడు. ఈ సినిమాలో కీలక పాత్రకు తనను రెకమండ్ చేసింది మహేష్ బాబే అని వెల్లడించాడతను. సినిమాలో ఎంతో కీలకమైన హీరో ఫ్రెండు పాత్ర గురించి మహేష్ బాబుకు వంశీ పైడిపల్లి చెప్పగా.. ఆ పాత్రకు తాను బాగుంటానని మహేస్ బాబే రెకమండ్ చేశాడని.. ఈ విషయాన్ని దర్శకుడు వంశీ తర్వాత తనకు చెప్పాడని నరేష్ తెలిపాడు. సినిమాలో తనది అతిథి పాత్ర కాదని.. సినిమా అంతటా తాను ఉంటానని నరేష్ చెప్పాడు. మహేష్ బాబు ఎక్కడుంటే అక్కడ తన పాత్ర కూడా ఉంటుందని.. ఈ క్యారెక్టర్ అంత కీలకమని నరేష్ తెలిపాడు.

మహేష్ బాబు.. వంశీ పైడిపల్లి ఎంతో నమ్మకంతో తనకు ఈ పాత్ర ఇచ్చారని.. వాళ్ల నమ్మకాన్ని నిలబెట్టడానికి తాను వంద శాతం ప్రయత్నిస్తానని నరేష్ అన్నాడు. తనకు పాప పుట్టిన తర్వాత ఒప్పుకున్న మొదటి సినిమా ఇదే అని.. ఇది నటుడిగా తనకు రీఎంట్రీలా భావిస్తున్నానని నరేష్ అన్నాడు. ఇప్పటికే ‘మహర్షి’ కోసం నెలన్నర షూటింగులో పాల్గొన్నానని.. మహేష్ బాబుతో పని చేయడం గొప్ప అనుభవమని.. ఇంకో వంద రోజుల పాటు ఈ చిత్ర షూటింగులో పాల్గొనాల్సి ఉందని నరేష్ వెల్లడించాడు. ‘గమ్యం’లో గాలి శీను పాత్రలా ‘మహర్షి’లో తన పాత్ర కెరీర్లో ప్రత్యేకంగా నిలిచిపోతుందని నరేష్ ఆశాభావం వ్యక్తం చేశాడు. మహేష్ తో పని చేయడం చాలా ఈజీ అని.. ఆయనకు మంచి సెన్సాఫ్ హ్యూమర్ ఉందని.. ఎవరైనా జోకులు వేసినా బాగా ఎంజాయ్ చేస్తాడని నరేష్ అన్నాడు. ఈ సినిమా తర్వాత తన కెరీర్ ఊపందుకుంటుందని నరేష్ ఆశాభావం వ్యక్తం చేశాడు. ఈ సంగతలా ఉంచితే హీరోగా నరేష్ కొత్త సినిమా ‘సిల్లీ ఫెలోస్’ శుక్రవారం ప్రేక్షకుల ముందుకు రానుంది.