మహేష్ చుట్టూ గుండాలు - ఏం జరుగుతోంది ?

సూపర్ స్టార్ మహేష్ బాబు మహర్షి విడుదలకు ఇంకా చాలా టైం ఉన్న నేపథ్యంలో అభిమానులు అప్ డేట్స్ తో కాలం గడిపేస్తున్నారు. షూటింగ్ ఎలాంటి విఘ్నాలు లేకుండా సాగుతుండటంతో రిలీజ్ డేట్ గా ఫిక్స్ చేసిన ఏప్రిల్ 5లో ఎలాంటి మార్పు ఉండదు. రామోజీ ఫిలిం సిటీలో వేసిన ప్రత్యేకమైన విలేజ్ సెట్ లో చాలా కీలకమైన సన్నివేశాలు చిత్రీకరించబోతున్నారు. ఇదిలా ఉండగా టాలీవుడ్ అత్యధిక బ్రాండ్లకు అంబాసడర్ గా ఉన్న మహేష్ ను ముందు నుంచి వదలకుండా అంటిపెట్టుకుంది థమ్స్ అప్. ఇతర భాషల్లో దీనికి స్టార్లు మారినా మహేష్ మాత్రం దీనికి అండగా నిలబడి యాడ్స్ లో నటిస్తూనే ఉన్నాడు.

ఇప్పుడు కొత్తగా యాడ్స్ లో కూడా టీజర్ ట్రెండ్ మొదలైంది. మహా అంటే నిమిషం లోపే ఉండే యాడ్ కి టీజర్ ఏంటి అని ఆశ్చర్యపోకండి. యాడ్ ని సగమే చూపించి సస్పెన్స్ లో వదిలేస్తే దాన్ని అలాగే తీసుకోవాలి కదా. ఇక యాడ్ విషయానికి వస్తే ఏదో రిస్కీ అడ్వెంచర్ చేస్తున్న మహేష్ చుట్టూ బారు తుపాకులతో గూండాలు చుట్టుముట్టి ఉంటారు. ఈజీగా తప్పించుకోవడానికి అదేమి విశాలమైన రోడ్డు కాదు.

కొండపై ఎత్తైన జలపాతాల మధ్యలో ప్రాణాలకు తెగించి మహేష్ వాళ్ళ మధ్య ఉన్నాడు. తప్పించుకోవడం ఖాయమే కానీ అది ఎలా చేస్తాడు అనేదే సస్పెన్స్. సోషల్ మీడియాలో పోస్ట్ చేసిన ఈ వీడియో బైట్ ఇప్పుడు వైరల్ అవుతోంది. మహేష్ ఫేస్ తీవ్రమైన ఇంటెన్సిటీ తో అభిమానులకు కిక్ ఇచ్చేలా ఉంది. ఇంత సాహసం చేసిన మహేష్ దానికి కారణం చివర్లో థమ్స్ అప్ అని చెబుతాడని వేరే చెప్పాలా.