పవన్ మామ కోసం వెయిటింగ్

స్టార్ హీరోలకు జోడీగా నటించేందుక సరైన హీరోయిన్లు దొరక్క ఇబ్బంది పడటం ఈ మధ్య మామూలైపోయింది. ఇందుకోసం కొన్ని సినిమాల షూటింగులకు కూడా బ్రేక్ పడుతోంది. ఐతే పవర్ స్టార్ పవన్ కళ్యాణ్ కొత్త సినిమా విషయంలో మాత్రం.. అతడి మామ పాత్రలో నటించే నటుడి కోసం షూటింగ్ వాయిదా వేయాల్సిన అవసరం వచ్చిందట. ఈ చిత్రంలో పవన్ కు అత్తా మామల పాత్రలు చాలా ప్రత్యేకంగా ఉంటాయని సమాచారం. అందులో అత్త పాత్రకు తమిళ సీనియర్ నటి ఖుష్బూను ఎంచుకున్నారు. పవన్ తో ఆమె కాంబినేషన్లో కీలకమైన సన్నివేశాలు కూడా కొన్ని తీశారు. కానీ ‘మామ’ పాత్ర ఉన్న సన్నివేశాలు మాత్రం అలాగే పక్కన పెట్టారట. ఈ పాత్రకు తగ్గ నటుడి కోసం కొన్ని నెలలుగా అన్వేషణ కొనసాగుతోందట.

ఈ పాత్రలో మోహన్ లాల్ నటిస్తాడని ఇంతకుముందు వార్తలొచ్చాయి. మరి ఆయన్ని వీళ్లు సంప్రదించారో లేదో తెలియదు మరి. వేరే ఆప్షన్లు కూడా పరిశీలించి ఏదీ వర్కవుట్ కాక సైలెంటయ్యారట. ఇప్పుడు ఎలాగూ ఈ సినిమా షూటింగ్ కు విరామం ప్రకటించిన నేపథ్యంలో మామ పాత్రకు తగ్గ నటుడిని మళ్లీ షెడ్యూల్ మొదలయ్యే లోపు ఫైనలైజ్ చేద్దామని చూస్తున్నారట. మళయాళ ఇండస్ట్రీకే చెందిన మరో సూపర్ స్టార్ మమ్ముట్టి పేరు కూడా పరిశీలనలో ఉన్నట్లు సమాచారం. ఆయన్ని ఒప్పించగలిగితే మాత్రం సినిమాకు ప్రత్యేక ఆకర్షణగా నిలుస్తారనడంలో సందేహం లేదు. మోహన్ లాల్ ఈ మధ్య తెలుగులో మంచి ఫాలోయింగ్ తెచ్చుకుని తన సినిమాల్ని వరుసగా ఇక్కడ రిలీజ్ చేసుకుంటున్నాడు. పవన్-త్రివిక్రమ్ కాంబినేషన్‌ కు ఉన్న క్రేజ్ ఏంటో అర్థం చేసుకుంటే మమ్ముట్టి కూడా ఇక్కడో రాయి వేస్తే ఆయనకు బాగానే కలిసొచ్చే అవకాశముంది.

Like Us on Facebook : https://www.facebook.com/Tupakidotcom/