మంచు ఫ్యాన్స్ మనసంతా 'సన్నాఫ్ ఇండియా'పైనే!

తెలుగు తెరకు నిండుదనాన్ని .. పండుగదనాన్ని తెచ్చిన కథానాయకులలో మోహన్ బాబు ఒకరు. పవర్ఫుల్ విలన్ గా .. కామెడీ టచ్ ఉన్న విలన్ గా .. హీరోగా ఆయన చేసిన ప్రయోగాలు అన్నీ ఇన్నీ కాదు. మోహన్ బాబు హైటు .. ఆయన నడక .. డైలాగ్ డెలివరీ ప్రత్యేక ఆకర్షణ అనే చెప్పాలి. ఏ పాత్రను పోషించినా ఆ పాత్రపై తనదైన ముద్ర వేయడం మోహన్ బాబుకు అలవాటు. ఎంత వేగంగా డైలాగ్ చెప్పినా అది ఆడియన్స్ కి స్పష్టంగా అర్థమయ్యేలా చెప్పడం మోహన్ బాబు ప్రత్యేకత.

అలాంటి మోహన్ బాబు కథానాయకుడిగానే అయినా తన వయసుకి తగిన పాత్రలను చేస్తూ వెళుతున్నారు. 'రౌడీ' .. 'గాయత్రి' వంటి సినిమాలు చూస్తే, మోహన్ బాబు నటనలో వాడి .. వేడి ఇంకా ఎంతమాత్రం తగ్గలేదనే విషయం అర్థమవుతుంది. ఆయన చూపుల్లోని పదునులో .. డైలాగ్ డెలివరీలోని పవర్లో ఇప్పటికీ మార్పు లేదనిపిస్తుంది. ఈ రెండు సినిమాల్లోను ఆయన డిఫరెంట్ లుక్స్ తోనే కనిపించారు .. తనదైన స్టైల్ తోనే మెప్పించారు. తాను కథానాయకుడిగా ఆయన మరోసారి ప్రేక్షకుల ముందుకు రావడానికి సిద్ధమైపోతున్నారు.

మోహన్ బాబు తాజా చిత్రంగా 'సన్నాఫ్ ఇండియా' సినిమా రూపొందుతోంది. ఈ సినిమాలోను మోహన్ బాబు కొత్త లుక్ తో కనిపించనున్నారు. టైటిల్ ను బట్టే ఈ కథ .. మోహన్ బాబు పాత్ర ఎంత పవర్ఫుల్ గా ఉంటాయనేది అర్థమైపోతోంది.
ఆయన పాత్రలో ఎన్నో వేరియేషన్స్ ఉంటాయనే విషయం ఇటీవల వదిలిన లిరికల్ వీడియో వలన స్పష్టమవుతోంది. డైమండ్ రత్నబాబు దర్శకుడిగా వ్యవహరిస్తున్న ఈ సినిమా కోసం, ఆయన అభిమానులంతా ఎంతో ఆత్రుతగా ఎదురుచూస్తున్నారు. ఈ సినిమా ఆయనకి తప్పకుండ హిట్ తెచ్చిపెడుతుందనే నమ్మకాన్ని వ్యక్తం చేస్తున్నారు.