ఇంట్రెస్టింగ్ గాసిప్: 'మెగా - అక్కినేని' మల్టీస్టారర్..

టాలీవుడ్‌ లో మ‌ల్టీస్టారర్స్ మళ్ళీ ఊపందుకున్నాయి. ఇతర స్టార్ హీరోలతో కలిసి స్క్రీన్ షేర్ చేసుకోడానికి మన హీరోలు వెనుకాడటం లేదు. ఒకప్పుడు ఎన్టీఆర్ - ఏఎన్నార్ - కృష్ణ - కృష్ణంరాజు - శోభన్ బాబు వంటి సీనియర్ హీరోలు మల్టీస్టారర్ చిత్రాలు చేయడానికి ఎప్పుడూ సిద్ధంగా ఉండేవారు. కానీ ఆ తర్వాత తరంలో స్టార్ హీరోలైన చిరంజీవి - నాగార్జున - వెంకటేష్ - బాలకృష్ణ మాత్రం మల్టీస్టారర్స్ చేయడానికి సాహసించలేదు.

అప్పట్లో కె.రాఘవేంద్రరావు దర్శకత్వంలో చిరు - నాగ్ హీరోలుగా ఓ మల్టీస్టారర్ కోసం ప్రయత్నాలు జరిగాయి. అలానే మణిరత్నం డైరెక్షన్ లో నాగార్జున - వెంకటేష్ లతో 'ఘర్షణ' సినిమా చేయాలని అనుకున్నారు. కానీ ఈ రెండు ప్రాజెక్ట్స్ కార్యరూపం దాల్చలేదు. కానీ ఇప్పటి స్టార్ హీరోలు మాత్రం కథ నచ్చితే వెంటనే మల్టీస్టారర్స్ కు ఓకే చెబుతున్నారు. ప్రస్తుతం టాలీవుడ్ లో కొన్ని మ‌ల్టీస్టార‌ర్స్ షూటింగ్ దశలో ఉండగా.. మ‌రికొన్ని చ‌ర్చ‌ల ద‌శ‌లో ఉన్నాయి. ఈ క్రమంలో ఇప్పుడు మెగా అక్కినేని హీరోల మల్టీస్టారర్ అంటూ ఓ ఇంట్రెస్టింగ్ గాసిప్ చక్కర్లు కొడుతోంది.

వివరాల్లోకి వెళ్తే.. మెగా హీరో సాయి తేజ్ కు ఓ డెబ్యూ డైరెక్టర్ చెప్పిన కథ నచ్చిందట. అయితే ఇది మల్టీస్టారర్ స్టోరీ అవడంతో మరో హీరోగా అఖిల్ లేదా నాగ‌ చైత‌న్య‌ల‌లో ఎవరైనా బాగుంటుంద‌ని సాయి తేజ్ భావించారట. దీంతో ఈ క‌థ‌ ఇప్పుడు అక్కినేని అన్నదమ్ముల వద్దకు వెళ్లిందని.. చైతన్య - అఖిల్ లలో ఎవ‌రు ఓకే అన్నా మెగా - అక్కినేని మల్టీస్టారర్ కు బీజం పడుతుందని టాక్ నడుస్తోంది. అయితే మెగా హీరోలు అంతమంది ఉండగా.. సాయి తేజ్ అక్కినేని హీరోలను సూచించారు అనడంలో ఎంత నిజముందో తెలియాల్సి ఉంది.