పవన్ సినిమాలో ఎన్టీఆర్ పెదనాన్న

ఎన్టీఆర్ బాబాయి గురించి అందరికీ తెలుసు కానీ.. మరి పెదనాన్న ఎవరు.. ఆయన పవన్ సినిమాలో నటించడమేంటి అని ఆశ్చర్యపోకండి. ఇక్కడ మాట్లాడుతోంది నిజ జీవితంలో పెదనాన్న గురించి కాదు. సినిమా పెదనాన్న గురించి. ఈ ఏడాది టాలీవుడ్ హైయెస్ట్ గ్రాసర్ గా నిలిచిన ‘జనతా గ్యారేజ్’లో ఎన్టీఆర్ కు పెదనాన్నగా మలయాళ సూపర్ స్టార్ నటించిన సంగతి తెలిసిందే. ఆయన ఇప్పుడు పవన్ కళ్యాణ్ హీరోగా త్రివిక్రమ్ రూపొందించబోయే సినిమాలోనూ కీలక పాత్ర చేసే అవకాశాలున్నట్లు సమాచారం. త్రివిక్రమ్ సినిమాలో ఓ పవర్ ఫుల్ క్యారెక్టర్ రోల్ ఉందట. ఆ పాత్రను ఎవరితో చేయిద్దామా అని కొన్నాళ్లుగా తర్జన భర్జన పడుతున్నాడట మాటల మాంత్రికుడు.

ముందు ఈ పాత్రకు ఉపేంద్ర పేరు వినిపించింది. ‘సన్నాఫ్ సత్యమూర్తి’ తర్వాత మరోసారి ఉపేంద్రతో ఓ ప్రత్యేక పాత్ర చేయించాలని అనుకున్నాడు త్రివిక్రమ్. ఐతే ఇప్పుడు మనసు మార్చుకుని మోహన్ లాల్ వైపు చూస్తున్నట్లు సమాచారం. ఈ ఏడాది మనమంతా.. జనతా గ్యారేజ్.. మన్యం పులి సినిమాలతో తెలుగులో అనూహ్యంగా క్రేజ్ సంపాదించుకున్నాడు మోహన్ లాల్. తెలుగు ప్రేక్షకులకు ఆయన భలేగా కనెక్టయిపోయాడు. లాల్ కూడా తెలుగులో మార్కెట్ పెంచుకోవాలనుకుంటున్నాడు. ఈ నేపథ్యంలో పవన్-త్రివిక్రమ్ సినిమాకు లాల్ ఓకే అయ్యే అవకాశాలు బాగానే ఉన్నాయి. ఈ చిత్రాన్ని నిర్మించబోతున్న రాధాకృష్ణ మోహన్ లాల్ తో సంప్రదింపులు జరుపుతున్నట్లు సమాచారం.

Like Us on Facebook : https://www.facebook.com/Tupakidotcom/