'మోసగాళ్ళు' ట్రైలర్: ప్రపంచంలోనే అతిపెద్ద ఐటీ స్కామ్ నేపథ్యంలో తెరకెక్కుతున్న యాక్షన్ థ్రిల్లర్

మంచు విష్ణు - కాజల్ అగర్వాల్ ప్రధాన పాత్రలతో తెరకెక్కిన పాన్ ఇండియా మూవీ ''మోసగాళ్ళు''. 24 ఫ్రేమ్స్ ఫ్యాక్టరీ - ఏవీఏ ఎంటర్టైన్మెంట్స్ బ్యానర్లపై ఈ సినిమా రూపొందుతోంది. హాలీవుడ్ డైరెక్టర్ జెఫ్రీ గీ చిన్ ఈ చిత్రానికి దర్శకత్వం వహిస్తున్నారు. ప్రపంచంలోనే అతిపెద్ద ఐటీ స్కామ్ నేపథ్యంలో వస్తున్న ఈ సినిమాపై ప్రేక్షకుల్లో మంచి అంచనాలు ఉన్నాయి. ఈ చిత్రాన్ని మార్చి నెలలో ప్రేక్షకుల ముందుకు తీసుకురావడానికి సన్నాహాలు చేస్తున్నారు. ఈ నేపథ్యంలో ప్రమోషన్స్ స్పీడ్ పెంచిన మేకర్స్ ఇప్పటికే టీజర్ - సాంగ్స్ విడుదల చేశారు. ఈ క్రమంలో తాజాగా మెగాస్టార్ చిరంజీవి 'మోసగాళ్ళు' థియేట్రికల్ ట్రైలర్ ని సోషల్ మీడియాలో విడుదల చేసి చిత్ర యూనిట్ కు విషెస్ అందించారు.

''డబ్బు సంతోషాన్ని ఇస్తుందనుకున్నా.. డబ్బు సెక్యూరిటీ ఇస్తుందనుకున్నా.. ఒట్టేసుకున్నా ఈ పేదరికం నుంచి దూరంగా వెళ్లిపోవాలని..'' అంటూ మంచు విష్ణు చెప్పే డైలాగ్ తో ఈ ట్రైలర్ ప్రారంభమైంది. తమ తెలివితో టెక్నాలజీని వాడుకుని అమెరికాలో రూ.2600 కోట్ల భారీ కుంభకోణానికి పాల్పడిన ఇండియన్స్ కథను ఇందులో చూపిస్తున్నట్లు అర్ధం అవుతోంది. వీరిని పట్టుకోవాలని చూసే పవర్ ఫుల్ పోలీస్ ఆఫీసర్ గా బాలీవుడ్ నటుడు సునీల్ శెట్టి నటించాడు. విష్ణు - కాజల్ అన్నా చెల్లెలుగా నటించారు. నవదీప్ - నవీన్ చంద్ర ఈ స్కామ్ లో విష్ణుకు సహాయం చేసే వ్యక్తులుగా కనిపిస్తున్నారు. రుహీ సింగ్ హీరోయిన్ గా నటించింది.

'ల‌క్ష్మీ దేవి అంత రిచ్ ఎందుకో తెలుసా, నాలుగు చేతుల‌తో సం‌పాదిస్తుంది కాబ‌ట్టి' అని కాజ‌ల్ చెప్పే డైలాగ్‌ తో పాటు 'డ‌బ్బు ఉన్న వాడి ద‌గ్గ‌ర డ‌బ్బు కొట్టేయ‌డం త‌ప్పేమి కాద‌నే' డైలాగ్ ఆక‌ట్టుకుంటున్నాయి. ఇందులో లిప్ కిస్సులను కూడా చూపించి రొమాన్స్ కూడా ఉందని హింట్ ఇచ్చారు. ఈ హై ఆక్టేన్ యాక్షన్ థ్రిల్లర్ ట్రైలర్ ఎంతో ఆసక్తికరంగా సాగింది. దీనికి సామ్ సీఎస్ నేపథ్య సంగీతం.. షెల్డన్ చౌ సినిమాటోగ్రఫీ ఆకట్టుకుంటున్నాయి. మొత్తం మీద ఈ ట్రైలర్ తో సినిమాపై ఉన్న అంచనాలను మరింత పెరిగాయి. 'మోసగాళ్ళు' చిత్రాన్ని తెలుగు, తమిళం, మలయాళం, కన్నడ మరియు హిందీ భాషలలో విడుదల చేయనున్నారు.

Full View