'కల్కి' దర్శకుడు IFFIలో 20 ఏళ్ల క్రితం, ఇప్పుడు..!

2015లో 'ఎవడే సుబ్రమణ్యం'తో ప్రేక్షకుల ముందుకు దర్శకుడిగా వచ్చిన నాగ్‌ అశ్విన్‌ చేసింది తక్కువ సినిమాలే అయినా టాలీవుడ్‌ స్థాయిని హాలీవుడ్‌కి తీసుకు వెళ్లాడు. మొదటి సినిమా తర్వాత మూడు సంవత్సరాలు బ్రేక్‌ తీసుకుని మహానటి సినిమాను ప్రేక్షకుల ముందుకు తీసుకు వచ్చాడు. ఆ సినిమాతో పలు జాతీయ అవార్డులను సొంతం చేసుకున్న నాగ్‌ అశ్విన్‌ ఇటీవల ప్రభాస్‌తో కల్కి సినిమాతో ప్రేక్షకుల ముందుకు వచ్చాడు. వెయ్యి కోట్లకు పైగా వసూళ్లు సాధించిన కల్కి సినిమా బాక్సాఫీస్‌ వద్ద సంచలన విజయాన్ని సొంతం చేసుకోవడంతో పాటు నాగ్‌ అశ్విన్‌ విజనరీకి అంతా ఫిదా అవుతున్నారు. నాగ్‌ అశ్విన్‌ తాజాగా ఇన్‌స్టాలో షేర్‌ చేసిన ఒక పిక్‌ ప్రస్తుతం అందరి దృష్టిని ఆకర్షిస్తోంది.

ప్రస్తుతం గోవాలో ఇంటర్నేషనల్ ఫిల్మ్ ఫెస్టివల్ ఆఫ్ ఇండియా వైభవంగా జరుగుతున్న విషయం తెల్సిందే. ఈ వేడుకల్లో కల్కి సినిమా ప్రత్యేక ఆకర్షణగా నిలుస్తుంది. నిర్మాతలతో పాటు యూనిట్‌ సభ్యులు పలువురు ఆ ఫిల్మ్‌ ఫెస్టివల్‌లో సందడి చేయడం జరిగింది. ఒక వైపు ఇంటర్నేషనల్ ఫిల్మ్ ఫెస్టివల్ ఆఫ్ ఇండియా జరుగుతున్న ఈ సమయంలో నాగ్‌ అశ్విన్‌ ఇన్‌స్టాగ్రామ్‌ స్టోరీ లో తాను 2004లో ఇంటర్నేషనల్ ఫిల్మ్ ఫెస్టివల్ ఆఫ్ ఇండియా ఈవెంట్‌ కోసం వర్క్‌ చేసిన విషయాన్ని షేర్‌ చేసుకున్నాడు. మొదటి సారి గోవాలో ఇంటర్నేషనల్ ఫిల్మ్ ఫెస్టివల్ ఆఫ్ ఇండియా నిర్వహించిన సమయంలో తాను ఈవెంట్‌ మేనేజ్మెంట్‌లో ఒక వ్యక్తిగా పని చేశాను అంటూ ఐడీ కార్డ్‌ను షేర్‌ చేశారు.

మొదటి సారి గోవాలో ఇంటర్నేషనల్ ఫిల్మ్ ఫెస్టివల్ ఆఫ్ ఇండియా ఈవెంట్‌ జరిగిన సమయంలో ఎయిర్‌ పోర్ట్‌లో గెస్ట్‌లను రిసీవ్‌ చేసుకోవడంతో పాటు, సినిమాలను గోవాలోని రూరల్‌ ఏరియాల్లో స్క్రీనింగ్‌ అయ్యేలా చూడటం తన బాధ్యత అంటూ పోస్ట్‌లో రాసుకు వచ్చారు. 20 ఏళ్ల క్రితం ఆ ఈవెంట్‌లో ఒక అసిస్టెంట్‌గా వర్క్ చేసిన నాగ్‌ అశ్విన్‌ ఇప్పుడు ఆ ఈవెంట్‌లో తన సినిమా స్క్రీనింగ్‌ అయ్యేలా అభివృద్ది చెందారు. ఒక వ్యక్తి జీవితంలో అభివృద్ధి, గొప్ప విజయం అంటే ఇంతకు మించి ఉంటుందా అంటూ ఆయనపై సోషల్‌ మీడియాలో పలువురు ప్రశంసల వర్షం కురిపిస్తున్నారు.

కల్కి 2898 ఏడీ సినిమా భారీ విజయాన్ని సొంతం చేసుకున్న నేపథ్యంలో పార్ట్‌ 2 కోసం ప్రేక్షకులు చాలా ఆసక్తిగా ఎదురు చూస్తున్నారు. రికార్డ్‌ స్థాయిలో సినిమా వసూళ్లు నమోదు అయిన నేపథ్యంలో పార్ట్‌ 2 అంతకు మించి అన్నట్లుగా ఉండాలనే ఉద్దేశ్యంతో నాగ్‌ అశ్విన్‌ ప్లాన్‌ చేస్తున్నారు. పార్ట్‌ 2 కి సంబంధించి ఇప్పటికే 30 శాతం షూటింగ్‌ జరిగిందని, మిగిలిన వర్క్ వచ్చే ఏడాదిలో ఉంటుంది అంటూ ఇటీవల నిర్మాతల్లో ఒకరు అయిన స్వప్న దత్‌ అన్నారు. వీఎఫ్‌ఎక్స్‌ వర్క్ తో పాటు షూటింగ్‌ అంతా వచ్చే ఏడాదిలో ముగించి 2026లో సినిమాను విడుదల చేసే విధంగా ప్లాన్‌ చేస్తున్నారనే వార్తలు వస్తున్నాయి. త్వరలోనే కల్కి 2 సినిమాపై అధికారికంగా స్పష్టత ఇచ్చే అవకాశాలు ఉన్నాయి.