నా ఇంట్లో.. ఇలాంటి డ్యాన్సరా-నాగ్

తెలుగు సినీ పరిశ్రమకు డ్యాన్సులు పరిచయం చేసిందే అక్కినేని నాగేశ్వరరావు. అప్పటిదాకా ఐటెం భామలు, హీరోయిన్లు మాత్రమే సినిమాల్లో డ్యాన్సులేసేవాళ్లు. కానీ ఏఎన్నార్ హీరోలు కూడా డ్యాన్సులేయొచ్చని నిరూపించారు. ఇప్పుడు డ్యాన్స్ చేయనివాడు హీరోనే కాదనే పరిస్థితి. ఓ కొత్త హీరో ఇండస్ట్రీలోకి వస్తున్నాడంటే.. అతడికి ఏం వచ్చినా రాకపోయినా డ్యాన్సులు మాత్రం అదిరిపోవాల్సిందే. అందుకే ప్రతి కొత్త హీరో సినిమాల్లోకి అడుగుపెట్టేముందు డ్యాన్సుల్లో బాగా ట్రైనప్ అయి వస్తున్నాడు. ఇక టాలీవుడ్ లో హీరోలు డ్యాన్సులేసే ఒరవడికి శ్రీకారం చుట్టిన అక్కినేని ఫ్యామిలీ నుంచి రాబోతున్న యువ కథానాయకుడు అఖిల్ డ్యాన్సుల్లో బాగానే ఆరితేరాడని ఇప్పటిదాకా వచ్చిన మేకింగ్ వీడియోలు - ట్రైలర్ బట్టి తెలిసిపోయింది.

ఇప్పటికే అఖిల్ డ్యాన్సుల విషయంలో అక్కినేని అభిమానులు భారీ అంచనాలతో ఉన్నారు. ఇక తాజాగా నాగార్జున చెబుతున్న మాటలు చూస్తుంటే అంచనాలు రెట్టింపయ్యేలా ఉన్నాయి. ‘అఖిల్’ వాయిదా గురించి ప్రెస్ మీట్ లో నాగార్జున మాట్లాడుతూ.. ‘‘నేను సినిమా చూశాను. పాటల్లో అఖిల్ పెర్ఫామెన్స్ చూసి షాకయ్యాను. ఇప్పటికీ నాకు షాకింగ్ గానే ఉంది. పాటల కోసం అతడు పడ్డ కష్టం అలాంటిలాంటిది కాదు. పాటల్లో అఖిల్ డ్యాన్సులు చూసి అభిమానులు మెస్మరైజ్ అయిపోతారు. పాటల్లో అఖిల్ డ్యాన్సులు చూసి ఇంటికొచ్చాక.. ఐదు నిమిషాలు అఖిల్‌ ను చూస్తూ ఉండిపోయాను. అసలు నా ఇంట్లో ఇలాంటి డ్యాన్సర్ తిరుగుతున్నాడా ఆశ్చర్యపోయాను. ఎప్పుడు నేర్చుకున్నావురా ఈ డ్యాన్సులన్నీ అని అఖిల్ ను అడిగాను. ఈ డ్యాన్సులవీ చూశాక ఫ్యాన్స్ సినిమా వాయిదా పడ్డం గురించి ఉన్న బాధంతా మర్చిపోతారు’’ అని చెప్పాడు.