నాగ్‌ ఆఫర్‌ ఇచ్చేశాడు

టాలెంట్‌ని గుర్తించడంలో నాగార్జున తర్వాతే ఎవరైనా. ఆయన ఎంతోమంది యువ దర్శకులకి ఛాన్సులిచ్చి వాళ్లతో సినిమాలు చేశారు. విజయాలూ అందుకొన్నారు. ఇప్పుడు తన కొడుకులనీ అదే దారిలో నడిపిస్తున్నారు. నాగచైతన్య తొలి నుంచీ కొత్త దర్శకులతోనే సినిమాలు చేస్తున్నారు. ఇటీవల విజయ్‌కుమార్‌ కొండాతో 'ఒక లైలా కోసం' చేశాక ఇప్పుడు సుధీర్‌వర్మతో 'దోచేయ్‌' చేస్తున్నారు. తదుపరి చందు మొండేటితో ఓ సినిమా చేయడానికి ప్లాన్‌ చేసుకొన్నాడు. తన తండ్రి సూచనలతోనే నాగచైతన్య ఇలా యంగ్‌ టాలెంట్‌తో పనిచేస్తున్నారు.

      అన్నట్టు నాగార్జున తన కొడుకుతో సినిమాలు చేసే దర్శకులకు మరో ఆఫర్‌ కూడా ఇచ్చేస్తున్నట్టు తెలుస్తోంది. ముందు తనతో హిట్టు తీసి రండి. ఆ తర్వాత నేను కూడా మీ దర్శకత్వంలో నటిస్తా అని చెబుతున్నారట. ఆ విషయాన్ని 'దోచేయ్‌' ఆడియో వేడుకలోనూ బయట పెట్టారు నాగార్జున. 'నేను, సుధీర్‌వర్మ కలిసి సినిమా చేయాలని మాట్లాడుకొన్నాం' అని చెప్పుకొచ్చారు. అంటే 'దోచేయ్‌' హిట్టయితే ఆ వెంటనే నాగ్‌-సుధీర్‌ కాంబినేషన్‌లో మరో సినిమా చూడొచ్చన్నమాట. అంతే కాదు.. నాగార్జునకి అభిమాని అయిన చందు మొండేటికి కూడా ఇలాంటి ఆఫరే ఇచ్చారట నాగ్‌. మొత్తంగా అన్నపూర్ణ కాంపౌండ్‌లోకి అడుగుపెట్టి ఒక హీరోతో సినిమా చేసి హిట్టుకొడితే చాలు... మరో హీరోతో ఛాన్స్‌ దొరుకుతుందన్నమాట.