ప్రీలుక్ తోనే గుబులు పెంచిన కింగ్ నాగార్జున‌

కింగ్ నాగార్జున న‌టించిన `వైల్డ్ డాగ్` క్రిటిక్స్ ప్ర‌శంస‌లు ద‌క్కించుకున్న సంగతి తెలిసిందే. జ‌యాప‌జ‌యాల‌తో సంబంధం లేకుండా ప్ర‌యోగాలు చేసేందుకు తాను ఎప్పుడూ సిద్ధ‌మేన‌ని నాగ్ ఇంత‌కుముందే ప్ర‌క‌టించారు. అందుకు త‌గ్గ‌ట్టే ఈసారి కూడా ఆయ‌న ప్ర‌యోగాల బాట‌లోనే వెళుతున్నారు. ప్రవీణ్ సత్తారు ద‌ర్శ‌క‌త్వంలో ప్ర‌స్తుతం భారీ యాక్షన్ ఎంట‌ర్ టైన‌ర్ లో న‌టిస్తున్నారు. ఇది హై యాక్షన్ థ్రిల్స్ తో ఆద్యంతం ర‌క్తి క‌ట్టించ‌నుంది. ఇందులో  నాగార్జున మోస్ట్ ప‌వ‌ర్ ఫుల్ పాత్రలో నటిస్తున్నారు.

నేడు చిత్ర‌నిర్మాత సునీల్ నారంగ్ పుట్టినరోజు సంద‌ర్భంగా శుభాకాంక్షలు చెబుతూ మూవీ పోస్ట‌ర్ ని చిత్ర‌బృందం రిలీజ్ చేసింది. చేతిలో కత్తితో నాగార్జున యాక్షన్ ప్యాక్డ్ అవతార్ లో ఉన్న ప్రీ-లుక్ పోస్టర్ ను విడుదల చేయ‌గా వైర‌ల్ గా మారింది. భీక‌రంగా కురుస్తున్న వ‌ర్షంలో వెళుతూ ర‌క్త‌సిక్త‌మైన క‌ర‌వాలంతో క‌నిపించారు నాగ్. అతడు బ్లాక్ క‌ల‌ర్ లాంగ్ కోట్ ని ధ‌రించి మిస్టీరియ‌స్ మ్యాన్ లా క‌నిపిస్తున్నాడు. ఈ పోస్ట‌ర్ చూడ‌గానే గ‌గుర్పొడిచే యాక్ష‌న్ విన్యాసాల‌కు కొద‌వేమీ ఉండ‌ద‌ని అర్థ‌మ‌వుతోంది.  నాగార్జున పుట్టినరోజు సందర్భంగా ఈ నెల 29 న ఈ టీమ్ నుంచి మ‌రో అద్భుతమైన అప్ డేట్ రానుంద‌ని కూడా పోస్ట‌ర్ లో వెల్ల‌డించారు.

కమర్షియల్ ఎంటర్ టైనర్లను డీల్ చేయడంలో స్పెషలిస్ట్ అయిన ప్రవీణ్ సత్తారు ఈసారికూడా మ‌రో విన్నింగ్ స్క్రిప్ట్ రాశారు. నిర్మాతలు దీనిని భారీ విజువల్ వండ‌ర్ గా తీర్చిదిద్ద‌డానికి అవ‌స‌ర‌మైన  బడ్జెట్ ను ఖర్చు చేస్తున్నారు. ఈ చిత్రాన్ని శ్రీ వెంకటేశ్వర సినిమాస్ LLP - నార్త్ స్టార్ ఎంటర్ టైన్ మెంట్ బ్యానర్స్ పై నారాయణ్ దాస్ కె నారంగ్- పుస్కూర్ రామ్ మోహన్ రావు - శరత్ మరార్ సంయుక్తంగా నిర్మిస్తున్నారు.

షూటింగ్ ప్రస్తుతం హైదరాబాద్ లో జరుగుతోంది.  నాగార్జున సరసన కాజల్ అగర్వాల్ కథానాయికగా నటిస్తుండగా... గుల్ పనాగ్ .. అనిఖా సురేంద్రన్ ముఖ్యమైన పాత్రల్లో కనిపించనున్నారు. ముఖేష్ జి సినిమాటోగ్రఫీ.. బ్రహ్మ కడలి కళా ద‌ర్శ‌క‌త్వం ప్ర‌ధాన అస్సెట్స్. రాబిన్ సుబ్బు- నభా మాస్టర్ త‌దిత‌ర‌ అత్యున్నత సాంకేతిక బృందం ఈ చిత్రం కోసం పనిచేస్తోంది.