ప్రొడక్షన్‌లో నాని మాష్టర్‌ మైండ్‌

రవితేజ తర్వాత ఎలాంటి బ్యాక్‌గ్రౌండ్‌ లేకుండా స్వయంకృషితో ఎదిగిన హీరోగా నానికి పేరుంది. రేడియో జాకీగా కెరీర్‌ ప్రారంభించిన అష్టా చెమ్మాతో హీరో అయ్యి, అంచెలంచెలుగా ఎదిగి, క్షణం తీరిక లేనంత బిజీ స్టార్‌గా మారాడు. అయితే ఇదంతా ఓవర్‌నైట్‌లో వచ్చింది కాదు. బోలెడంత ప్రతిభ, అదృష్టం కలిసొస్తేనే సాధ్యమైనది.

అయితే ఇటీవలి కాలంలో నానికి కొన్ని గుణపాఠాలు. కొన్ని ఎంపికల విషయంలో లెక్క సరికుదరక గాడి తప్పాడు. అయితే మళ్లీ ఎవడే సుబ్రహ్మణ్యం సినిమాతో హిట్‌ కొట్టి కెరీర్‌ని ట్రాక్‌లోకి తెచ్చాడు. నానిలో విషయం అయిపోలేదు. బోలెడంత ఉంది అని నిరూపించాడు. అంతేకాదండోయ్‌.. ఇప్పుడు నాని మైండ్‌ మరింత షార్ప్‌గా పనిచేస్తోంది. సొంతంగా ఓ ప్రొడక్షన్‌ హౌస్‌ ప్రారంభించి విషయం ఉన్న స్క్రిప్టుల్ని లాక్‌ చేయాలని భావిస్తున్నాడు. అందుకోసం ఇప్పటికే కసరత్తు ప్రారంభించాడు. కొన్ని కథలు విని నచ్చినవి లైబ్రరీలో దాచుకున్నాడు. కొత్త ట్యాలెంటు ఎక్కడ ఉన్నా వెతికి పట్టుకుని అవకాశాలిస్తున్నాడు.

ప్రస్తుతం మనోడు కో-ప్రొడ్యూసర్‌గా అవతారం ఎత్తి చిన్న సినిమాలు నిర్మించడానికి సన్నాహాలు చేస్తున్నాడు. వీటిలో కొత్తవారికి ఛాన్సిస్తాడు. తనకి సరిపడే స్క్రిప్టులు వస్తే వాటిలో తనే నటిస్తాడు. తనకి బాగా పరిచయమైన నిర్మాతల్ని ప్రొడక్షన్‌లో భాగస్వాములుగా చేర్చుకోవడానికి మంతనాలు సాగిస్తున్నాడు. ఇలా ప్రణాళికల్ని విస్తరిస్తున్నాడు. దీపం ఉండగానే ఇల్లు చక్కదిద్దుకునే పనిలో ఉన్నాడు నాని. ప్లాన్‌ బావుంది.. ఆల్‌ ది బెస్ట్‌ హీరోగారూ..