నారా రోహిత్.. కంప్లీట్ మేకోవర్

వరుసబెట్టి సినిమాలు చేయడమే కాదు.. వాటిలో వైవిధ్యం కూడా చూపించడం నారా రోహిత్‌ కే చెల్లింది. రోహిత్ ఇప్పటిదాకా చేసిన వాటిలో ఒక సినిమాకు, ఇంకో సినిమాకు పోలికే ఉండదు. ప్రస్తుతం ఒకేసారి అరడజను సినిమాల్ని లైన్లో పెట్టిన రోహిత్.. డేట్లు సర్దుబాటు చేసుకుంటూ షూటింగులకు హాజరవుతున్నాడు. ఈ మధ్యే ‘ప్రేమ ఇష్క్ కాదల్’ ఫేమ్ పవన్ సాధినేని దర్శకత్వంలో రోహిత్ హీరోగా ఓ సినిమా మొదలైన సంగతి తెలిసిందే.  ఇందులో నందిత కథానాయికగా నటిస్తోంది.

రోహిత్ ఈ సినిమాలో చాలా భిన్నంగా కనిపిస్తాడని.. లుక్ దగ్గర్నుంచి అన్ని విషయాల్లోనూ ఈ మూవీ అతడికి మేకోవర్ అవుతుందని చెబుతున్నాడు పవన్. ‘సోలో’ తర్వాత రోహిత్ నటిస్తున్న కంప్లీట్ ఫ్యామిలీ ఎంటర్ టైనర్ అని, కమర్షియల్ ఎలిమెంట్స్ ఢోకా లేకుండానే విభిన్నంగా ఉంటుందని చెప్పాడు. ఈ మూవీకి సంబంధించి రోహిత్, నందితల లుక్ చూస్తుంటే పవన్ మాటలు నిజమే అనిపిస్తోంది. రోహిత్ ఇందులో డిఫరెంట్ లుక్‌ లో కనిపిస్తున్నాడు. రోహిత్ హీరోగా నటించిన ‘రౌడీ ఫెలో’తో దర్శకుడిగా మారిన లిరిసిస్ట్ కృష్ణచైతన్య ఈ సినిమాకు మాటలు అందిస్తుండటం విశేషం. రాజేంద్రప్రసాద్ నిర్మిస్తున్న ఈ చిత్రానికి శ్రావణ్ సంగీతం అందిస్తున్నాడు.