నారా రోహిత్.. మళ్లీ అతడితో?

‘బాణం’ లాంటి మంచి సినిమాతో హీరోగా పరిచయమయ్యాడు నారా రోహిత్. ఆ సినిమా కమర్షియల్ గా పెద్ద సక్సెస్ కాకపోయినా రోహిత్ కు మంచి పేరు తెచ్చిపెట్టింది. ఇక సోలో సినిమా పేరుతో పాటు విజయాన్ని కూడా తెచ్చిపెట్టింది. రోహిత్ కెరీర్లో ఇదే బిగ్గెస్ట్ హిట్. యువ దర్శకుడు పరశురామ్ కు కూడా అది చాలా ప్రత్యేకమైన సినిమా. అతడికి కూడా కెరీర్లో పెద్ద హిట్ అంటే అదే. ఆ సినిమా తర్వాత ‘సారొచ్చారు’తో డిజాస్టర్ తిన్నాడు పరశురామ్.

ఆ తర్వాత చాలా గ్యాప్ తీసుకుని అల్లు శిరీష్ హీరోగా ‘శ్రీరస్తు శుభమస్తు’ రూపొందిస్తున్నాడు. ఈ చిత్రం ఆగస్టు లేదా సెప్టెంబర్లో ప్రేక్షకుల ముందుకొస్తుంది. ఈ సినిమా మీద చాలా కాన్ఫిడెంటుగా ఉన్న పరశురామ్ తన తర్వాతి సినిమాకు కూడా రంగం సిద్ధం చేసుకున్నట్లు సమాచారం. నారా రోహిత్ తోనే ఆ సినిమా ఉండొచ్చని తెలుస్తోంది. ‘సోలో’ తరహాలోనే మరో మంచి ఫ్యామిలీ లవ్ స్టోరీని ఇటీవలే రోహిత్ కు వినిపించాడట పరశురామ్. రోహిత్ ఓకే అనేశాడట.

ఈ ఏడాది ఆఖర్లో ఈ సినిమా సెట్స్ మీదికి వెళ్లే అవకాశముంది. ప్రస్తుతం నారా రోహిత్.. అవసరాల శ్రీనివాస్ దర్శకత్వంలో ‘జ్యో అచ్యుతానంద’ చేస్తున్నాడు. ఇదే కాక కథలో రాజకుమారి.. అప్పట్లో ఒకడుండేవాడు సినిమాలు కూడా సెట్స్ మీద ఉన్నాయి. వీటినుంచి ఫ్రీ అవ్వడానికి రెండు మూడు నెలలు పడుతుంది. ఆ సమయానికి పరశురామ్ స్క్రిప్టుతో రెడీగా ఉంటాడు. ఈ చిత్రాన్ని నిర్మించేది ఎవరో తెలియడంలేదు. నిర్మాతే ఈ ప్రాజెక్టును అఫీషియల్ గా అనౌన్స్ చేసే అవకాశముంది.