బాహుబలి రహస్యం ఆయనక్కూడా తెలియదట

కట్టప్ప బాహుబలిని ఎందుకు చంపాడు.. ఇప్పుడు సామాన్యుల నుంచి సెలబ్రెటీల వరకు అందరికీ ఇదే సందేహం. ఇండస్ట్రీలోని ఎందరో ప్రముఖులు ఈ ప్రశ్నకు సమాధానం తెలుసుకోవాలని ప్రయత్నించి విఫలమయ్యారు. ఐతే బయటి వాళ్ల సంగతి తర్వాత.. ‘బాహుబలి’కి పని చేసిన చాలామందికి కూడా ఆ రహస్యం తెలియదట. ప్రధాన పాత్రధారాల్లో ఒకరైన నాజర్ సైతం ఈ ప్రశ్నకు సమాధానం తెలియదనే అంటున్నారు. ‘ఓపెన్ హార్ట్ విత్ ఆర్కే’ కార్యక్రమంలో పాల్గొన్న నాజరే ఈ విషయాన్ని వెల్లడించాడు. కట్టప్ప బాహుబలిని ఎందుకు చంపాడనే విషయం తనకు ఇంతవరకూ తెలియదని చెప్పారాయన. తన భార్య కూడా తనను ఈ విషయం అడిగిందని.. కానీ ఆమెకు కూడా సమాధానం చెప్పలేకపోయానని నాజర్ తెలిపాడు. రాజమౌళి అంత రహస్యంగా ఈ విషయాన్ని దాస్తున్నట్లు చెప్పాడు నాజర్. ‘బాహుబలి’లో తాను చేసింది వికలాంగుడి పాత్ర అయినా అందులో చాలా ప్రత్యేకత ఉందని నాజర్ తెలిపారు.

ఇక ఈ ఇంటర్వ్యూలో నాజర్ అనేక ఆసక్తికర విషయాలు చెప్పారు. తాను నడిగర్ సంఘం ఎన్నికల్లో పోటీ చేయడానికి విశాలే కారణమని నాజర్ తెలిపాడు. నడిగర్ సంఘం ఎన్నికల ప్రచార సభల్లో ఎక్కడా ‘ఓడిపోతా’ అనే మాట వాడొద్దని.. గెలుస్తానని చెప్పమని విశాల్ కు చెప్పినట్లు నాజర్ వెల్లడించాడు. చిరంజీవితో తనకు గొప్ప అనుబంధం ఉందని.. అది ఎన్నో ఏళ్లుగా కొనసాగుతోందని నాజర్ తెలిపాడు. సినిమాలో తన పాత్రకు కనీసం ఇన్ని సీన్లు ఉండాలి.. నా పాత్ర ఇలాగే ఉండాలి అనే పరిమితులేమీ పెట్టుకోనని.. చిన్న సీన్ అయినా.. పెద్ద సీన్ అయినా.. ఈ పాత్ర నాజర్ మాత్రమే చేయాలనిపించేలా ఉండాలన్నది తన అభిమతమని నాజర్ తెలిపారు.

Like Us on Facebook : https://www.facebook.com/Tupakidotcom/