నయన్ స్కెచ్ వర్కవుట్ అవుతుందా?

చంద్రముఖి మూవీతో దక్షిణాదిని ఆకట్టుకున్న నయనతార.. ఇప్పుడు లేడీ సూపర్ స్టార్ ఇమేజ్ ను సంపాదించేసుకుంది. పర్సనల్ లైఫ్ లో ఎదురుదెబ్బలు తగిలిన ప్రతీసారి.. ఫీనిక్స్ పక్షి మాదిరిగా రెట్టింపు వేగంతో ప్రొఫెషనల్ గా తన కెరీర్ ను పరుగులు పెట్టించింది. ఇప్పుడీమె దర్శకుడు విఘ్నేష్ శివన్ తో పీకల్లోతు ప్రేమలో ఉందని. లివిన్ రిలేషన్ షిప్ లో ఉందనే టాక్ ముందు నుంచే వినిపిస్తోంది.

ఇతడికి పెద్ద హీరోలను డైరెక్ట్ చేసే అవకాశాలు అందడంలో.. చాలానే కష్టపడుతోంది. కాబోయే భర్తను బడా డైరెక్టర్ చేయాలనే ఆమె ఆరాటాన్ని అర్దం చేసుకోవచ్చు. ఇప్పుడు మరో పెద్ద టార్గెట్ కూడా ఫిక్స్ చేసుకుందట నయనతార. విఘ్నేష్ శివన్ ను హీరో చేయాలని కూడా ఫిక్స్ అయిపోయినట్లు తెలుస్తోంది. రీసెంట్ గా ఇతడు ఓ కొత్త తరహా కథను సిద్ధం చేసుకున్నాడు. హీరోయిన్ గా నయనతారనే తీసుకోవాలన్నది అతడి ఆలోచన. అదే కాన్సప్ట్ తో ఆమెకు విషయం వివరిస్తే.. నయన్ ఊహించని విధంగా రియాక్ట్ అయిందట.

ఈ ప్రాజెక్టులో నువ్వే హీరోగా నటించు అని చెప్పడమే కాదు.. ప్రస్తుతం తన దగ్గరకు వచ్చిన నిర్మాతలు అందరికీ ఇదే విషయాన్ని చెబుతోందట. విఘ్నేష్ హీరోగా అయితేనే సినిమా చేస్తానని తెగేసి చెబుతోందట. ప్రస్తుతం కోలీవుడ్ లో నయన్ కు ఉన్న మార్కెట్ బేస్ చేసుకుని చూస్తే.. ఆమెతో ఎవరు హీరోగా నటించినా మూవీ ఆడేయడం ఖాయం అనిపిస్తుంది. అందుకే అంతగా ఫేస్ వాల్యూ లేకపోయినా విఘ్నేష్ ను హీరోగా ఒప్పుకుని సినిమా చేసేందుకు రంగం సిద్ధం అయిపోతోందని టాక్.